ബിര്മ്മിങ്ഹാം :ഇംഗ്ലണ്ടിനെതിരെ നടന്ന അഞ്ചാം ടെസ്റ്റില് ആറാം വിക്കറ്റില് ഋഷഭ് പന്തും രവീന്ദ്ര ജഡേജയും ചേര്ന്നുണ്ടാക്കിയ 222 റണ്സ് കൂട്ടുകെട്ട് ചരിത്രത്തിലേക്ക്. എഡ്ജ്ബാസ്റ്റണ് ക്രിക്കറ്റ് ഗ്രൗണ്ടില് മാറ്റിവെച്ച അഞ്ചാം ടെസ്റ്റിലാണ് ചരിത്രം പിറന്നത്.
ആറാം വിക്കറ്റില് ഇരുവരും 239 പന്തില് 222 റണ്സിന്റെ റെക്കോര്ഡ് കൂട്ടുകെട്ട് പങ്കിട്ടു. ഇംഗ്ലണ്ടില് ഇന്ത്യന് ടീമിന്റെ വലിയ കൂട്ടുക്കെട്ടും ടെസ്റ്റ് ക്രിക്കറ്റിലെ നാലാമത്തെ വലിയ കൂട്ടുക്കെട്ടുമാണിത്. 1997ല് ദക്ഷിണാഫ്രിക്കയ്ക്കെതിരെ സച്ചിന് ടെന്ഡുല്ക്കറും മുഹമ്മദ് അസ്ഹറുദ്ദീന്റെയും കൂട്ടുക്കെട്ടില് പിറന്ന റെക്കോര്ഡിന് തുല്യമാണിത്.
വെള്ളിയാഴ്ച ആരംഭിച്ച കളിയില് ആദ്യ ദിവസം ഇന്ത്യ ഏഴ് വിക്കറ്റിന് 338 എന്നതായിരുന്നു സ്കോര്. 5 വിക്കറ്റിന് 98 റണ്സ് എന്ന നിലയില് ഇന്ത്യ തകര്ച്ചയെ നേരിടുമ്പോഴാണ് റെക്കാര്ഡ് കൂട്ടുകെട്ട് പിറന്നത്. ഇരുവരുടെയും മികച്ച ഇന്നിങ്സാണ് ഇന്ത്യുടെ സ്കോര് 300 റണ്സിന് മുകളിലെത്തിച്ചത്.
111 പന്തില് 146 റണ്സ് നേടിയ പന്ത് ടെസ്റ്റ് ക്രിക്കറ്റിലെ തന്റെ അഞ്ചാം സെഞ്ച്വറി നേടി. ജഡേജ 163 പന്തില് പുറത്താകാതെ 83 റണ്സെടുത്തു.
