ചെന്നൈ : ഷൂട്ടിംഗിനിടെ തമിഴ് നടൻ വിശാലിന് പരിക്കേറ്റു. വിശാല് കേന്ദ്ര കഥാപാത്രമായി എത്തുന്ന ലാത്തി എന്ന ചിത്രത്തിന്റെ ലൊക്കേഷനിൽ വെച്ചാണ് അപകടം. തുടർന്ന് ഷൂട്ടിംഗ് നിർത്തിവെച്ചു. എന്റർടെയ്ൻമെന്റ് ട്രാക്കർ ശ്രീധർ പിള്ളയാണ് ഇക്കാര്യം സമൂഹ മാദ്ധ്യമങ്ങളിലൂടെ അറിയിച്ചത്.
ക്ലൈമാക്സ് ചിത്രീകരിക്കുന്നതിനിടെയായിരുന്നു അപകടം. താരത്തിന്റെ കാലിന് പരിക്കേറ്റതിനെ തുടർന്നാണ് ഷൂട്ടിംഗ് നിർത്തിവെച്ചത്. ആരോഗ്യസ്ഥിതി മെച്ചപ്പെട്ടതിന് ശേഷം ചിത്രീകരണം പുനരാരംഭിക്കുമെന്നും അറിയിച്ചിട്ടുണ്ട്. ചിത്രത്തിന്റെ ആക്ഷൻ രംഗങ്ങൾ ഷൂട്ട് ചെയ്യുന്ന വീഡിയോ നേരത്തെ വിശാൽ പങ്കുവച്ചിരുന്നു.
ഇതേ ചിത്രത്തിന്റെ ഷൂട്ടിംഗിനിടെ വിശാലിന് നേരത്തെയും പരിക്കേറ്റിരുന്നു. ‘പുലിമുരുകന്റെ’ സ്റ്റണ്ട് കോറിയോഗ്രാഫർ ആയിരുന്ന പീറ്റർ ഹെയിനാണ് ലാത്തിക്ക് വേണ്ടിയും സ്റ്റണ്ട് സീനുകൾ ഒരുക്കിയിരിക്കുന്നത്.
ചിത്രത്തിൽ പോലീസ് ഉദ്യോഗസ്ഥന്റെ വേഷത്തിലാണ് വിശാൽ എത്തുന്നത്. തമിഴിന് പുറമെ മലയാളം, തെലുങ്ക്, കന്നഡ, ഹിന്ദി എന്നീ ഭാഷകളിലും ചിത്ര റിലീസ് ചെയ്യും. സുനൈനയാണ് നായിക. നടൻ പ്രഭുവും പ്രധാന കഥാപാത്രത്തെ അവതരിപ്പിക്കുന്നു. റാണ പ്രൊഡക്ഷൻസാണ് സിനിമയുടെ നിർമ്മാണം. യുവൻ ശങ്കർ രാജയാണ് ചിത്രത്തിന് സംഗീതം ഒരുക്കിയിരിക്കുന്നത്.
