സമൂസ പ്രേമികളെ ക്ഷണിക്കുകയാണ് ഉത്തർപ്രദേശിലെ ഒരു സ്വീറ്റ് ഷോപ്പ്. ഇവിടെ വന്ന് ഒരു സമൂസ മുഴുവനും കഴിച്ചു തീർത്താൽ അരലക്ഷം രൂപയാണ് കടയുമടമ വാഗ്ദാനം നൽകുന്നത്. ബാഹുബലി സമൂസയെന്ന് പേരിട്ടിരിക്കുന്ന പ്രത്യേക തരം സമൂസ മുഴുവനും കഴിക്കണമെന്ന് മാത്രമാണ് നിബന്ധന.
ഈ സമൂസയ്ക്ക് ചില സവിശേഷതകളുണ്ട്. പേര് സൂചിപ്പിക്കുന്നതുപോലെ തന്നെ ആളൽപ്പം ഭീമനാണ്. എട്ട് കിലോ തൂക്കമാണ് ബാഹുബലി സമൂസയ്ക്കുൂള്ളത്. ഇത് അരമണിക്കൂർ കൊണ്ട് കഴിച്ചുതീർക്കുകയാണെങ്കിൽ ഉപഭോക്താവിന് 51,000 രൂപ സമ്മാനമായി ലഭിക്കും. ബാഹുബലി സമൂസ ചലഞ്ച് എന്നാണ് കടയുടമ ഇതിന് പേരിട്ടിരിക്കുന്നത്.
യുപിയിലെ മീററ്റിലുള്ള കുശാൽ സ്വീറ്റ്സ് എന്ന കടയിലാണ് വ്യത്യസ്തമായ ഈ ചലഞ്ചുള്ളത്. ഇവിടുത്തെ സമൂസ വാർത്തകളിൽ ഇടം പിടിക്കണമെന്ന ആഗ്രഹം കൊണ്ടാണ് ഇത്തരമൊരു ചലഞ്ച് ഏർപ്പെടുത്തിയതെന്ന് കടയുടമ ശുഭം പറയുന്നു. ആദ്യം നാല് കിലോ തൂക്കമുള്ള സമൂസകളാണ് തയ്യാറാക്കിയിരുന്നത്. പിന്നീടത് എട്ട് കിലോയായി കൂട്ടുകയായിരുന്നു.
ഉരുളക്കിഴങ്ങ്, ചീസ്, കടലവർഗങ്ങൾ, ഡ്രൈ ഫ്രൂട്ട്സ് എന്നിവയടങ്ങിയ മിശ്രിതമാണ് ബാഹുബലി സമൂസയുടെ അകത്തുള്ളത്. ഇത്തരത്തിൽ എട്ട് കിലോ തൂക്കമുള്ള ഒരു ബാഹുബലി സമൂസ തയ്യാറാക്കാൻ 1,100 രൂപ ചിലവ് വരുമെന്നാണ് ശുഭം പറയുന്നത്. ഇതുവരെ ഒരാൾ മാത്രമാണ് ചലഞ്ച് ഏറ്റെടുത്ത് വിജയിച്ചതെന്നും കടയുടമ ചൂണ്ടിക്കാട്ടി. നിരവധിയാളുകൾ ചലഞ്ചിന്റെ ഭാഗമായി. ഭൂരിഭാഗം പേർക്കും നിർദ്ദിഷ്ട സമയത്തിനുള്ളിൽ സമൂസ കഴിച്ച് തീർക്കാൻ കഴിഞ്ഞിരുന്നില്ല. ഇനി പത്ത് കിലോ തൂക്കം വരുന്ന ബാഹുബലി സമൂസ തയ്യാറാക്കുകയാണ് ലക്ഷ്യമെന്നും കടയുടമ വെളിപ്പെടുത്തി.
ബാഹുബലി സമൂസ ഹിറ്റായതോടെ രാജ്യത്തിന്റെ വിവിധ ഭാഗങ്ങളിൽ നിന്നുള്ള ഫുഡ് വ്ളോഗർമാരാണ് കുശാൽ സ്വീറ്റ് ഷോപ്പിലേക്ക് എത്തുന്നത്. സമൂസ വാങ്ങി റീൽസ് എടുത്ത് പങ്കുവെക്കുന്നതോടെ ബാഹുബലി സമൂസയും കുശാൽ ഷോപ്പും കൂടുതൽ ജനശ്രദ്ധ നേടുന്നു.
Comments