അമരാവതി: എൻഡിഎയുടെ രാഷ്ട്രപതി സ്ഥാനാർത്ഥി ദ്രൗപദി മുർമുവിന് പിന്തുണ പ്രഖ്യാപിച്ച് തെലുങ്കുദേശം പാർട്ടി (ടിഡിപി). ഝാർഖണ്ഡ് മുൻ ഗവർണർ ദ്രൗപദി മുർമുവിന്റെ രാഷ്ട്രപതി സ്ഥാനാർത്ഥിത്വത്തിന് പിന്തുണയറിയിക്കുന്നുവെന്നും സാമൂഹ്യനീതിക്ക് പ്രതിജ്ഞാബദ്ധമാണ് പാർട്ടിയെന്നും ടിഡിപി അറിയിച്ചു. ജൂലൈ 11-ന് നടന്ന ടിഡിപിയുടെ കമ്മിറ്റി യോഗത്തിലാണ് ദ്രൗപദി മുർമുവിനെ പിന്തുണയ്ക്കാനുള്ള തീരുമാനം കൈക്കൊണ്ടതെന്ന് പാർട്ടിയുടെ ദേശീയ അദ്ധ്യക്ഷൻ എൻ ചന്ദ്രബാബു നായിഡു വ്യക്തമാക്കി.
നേരത്തെ ഇന്ത്യൻ രാഷ്ട്രപതി സ്ഥാനത്തേക്ക് മത്സരിച്ച കെആർ നാരായണനെയും എപിജെ അബ്ദുൾ കലാമിനെയും പാർട്ടി പിന്തുണച്ചിരുന്നുവെന്ന് ടിഡിപി അറിയിച്ചു. രാഷ്ട്രീയമായ പരിഗണനകൾക്ക് അതീതമായി സാമൂഹിക നീതിക്ക് പ്രാധാന്യം നൽകിയാണ് ടിഡിപി എന്നും പ്രവർത്തിച്ചിട്ടുള്ളത്. പി.വി നരസിംഹ റാവുവിനെ ഇന്ത്യയുടെ പ്രധാനമന്ത്രിയായി തിരഞ്ഞെടുക്കുന്നതിലും ടിഡിപി പൂർണ പിന്തുണ നൽകിയിരുന്നു. അതിനാൽ തെലുങ്ക് ജനതയ്ക്കൊപ്പം നിൽക്കുകയും സാമൂഹിക നീതിക്ക് പ്രതിജ്ഞാബദ്ധമായി പ്രവർത്തിക്കുകയും ചെയ്യുകയാണ് എപ്പോഴും ടിഡിപിയുടെ ലക്ഷ്യമെന്ന് ചന്ദ്രബാബു നായിഡു വ്യക്തമാക്കി.
അതിനിടെ ആന്ധ്രാപ്രദേശ് മുഖ്യമന്ത്രി വൈ.എസ് ജഗൻ മോഹൻ റെഡ്ഡിയെ ഇന്ന് ദ്രൗപദി മുർമു സന്ദർശിച്ചിരുന്നു. അദ്ദേഹത്തിന്റെ വസതിയിലെത്തിയാണ് രാഷ്ട്രപതി സ്ഥാനാർത്ഥി കൂടിക്കാഴ്ച നടത്തിയത്. ജൂലൈ 18നാണ് നിർണ്ണായകമായ രാഷ്ട്രപതി തിരഞ്ഞെടുപ്പ് നടക്കുന്നത്.
Comments