ലോകത്ത് തീർച്ചയായും കണ്ടിരിക്കേണ്ട അസാധാരണ സ്ഥലങ്ങളും പട്ടികയിൽ ഇന്ത്യയിൽ നിന്ന് രണ്ട് സ്ഥലങ്ങൾ. കേരളവും അഹമ്മദാബാദുമാണ് ടൈംസ് മാഗസിന്റെ പട്ടികയിൽ ഇടം നേടിയത്. കേരളം വളരെ മനോഹരമാണെന്നും കടത്തീരങ്ങളും വെള്ളച്ചാട്ടവും കൊണ്ട് സമ്പന്നമാണെന്നും മാഗസിനിൽ പറയുന്നു. ഇന്ത്യയിലെ ആദ്യത്തെ യുനെസ്കോ പൈതൃക നഗരമായ അഹമ്മദാബാദ് സാംസ്കാരിക ടൂറിസത്തിന്റെ കേന്ദ്രമാണെന്നാണ് വിശേഷിപ്പിച്ചിരിക്കുന്നത്.
ഇന്ത്യയുടെ തെക്ക് പടിഞ്ഞാറൻ തീരത്ത് സ്ഥിതി ചെയ്യുന്ന മനോഹരമായ സംസ്ഥാനമാണ് ദൈവത്തിന്റെ സ്വന്തം നാട് എന്നറിയപ്പെടുന്ന കേരളം എന്ന് മാഗസിനിൽ പറയുന്നു. ഇന്ത്യയിൽ മോട്ടോർ-ഹോം ടൂറിസം വർദ്ധിക്കുന്നതിൽ പ്രധാനപങ്ക് കേരളം വഹിക്കുന്നുണ്ട്. സംസ്ഥാനത്തെ ആദ്യത്തെ കാരവൻ പാർക്കായ കരവൻ മെഡോസ് പദ്ധതിയും എടുത്ത പറയേണ്ട ഒന്നാണ്. കേരളത്തിലെ ആയുർവേദ ജീവിത രീതി പിന്തുടരാൻ ആലുപ്പുഴയിലെ കായൽ പ്രദേശം മികച്ച ഇടമാണ് എന്നും വിശേഷിപ്പിക്കുന്നുണ്ട്.
പുരാതന കേന്ദ്രങ്ങളുടെയും സമകാലീന നവീകരണങ്ങളുടെയും ഒരു മിശ്രിതമാണ് അഹമ്മദാബാദ് എന്ന് മാഗസിനിൽ പറയുന്നു. സബർമതി നദിയുടെ തീരത്ത് സ്ഥിതി ചെയ്യുന്ന ഗാന്ധി ആശ്രമവും ലോകപ്രസിദ്ധമായ നവരാത്രി ആഘോഷങ്ങളും ആവേശകരമാണ്.
ഗുജറാത്ത് സയൻസ് സിറ്റി അമ്പരപ്പിക്കുന്നതാണ്. അക്വേറിയം, വിശാലമായ വിനോദ കേന്ദ്രം, തീം പാർക്ക്, നേച്ചർ പാർക്ക്, ചെസ്സ്, യോഗ പരിശീലിന പ്രദേശങ്ങൾ, റോബോട്ടിക്സിലെ നൂതനത്വം ആഘോഷിക്കുന്ന ഒരു പുതിയ ഇന്ററാക്ടീവ് റോബോട്ട് ഗാലറി എന്നിങ്ങനെ ഈ നഗരം വിസ്മയങ്ങളാൽ നിറഞ്ഞിരിക്കുകയാണെന്ന് വിശേഷിപ്പിക്കുന്നു.
