ഡെറാഡൂൺ: ഓടിക്കൊണ്ടിരുന്ന ബൈക്കിൽ നിന്നും യുവാവിനെ കടിച്ചെടുത്ത് കടുവ കാട്ടിനുള്ളിലേക്ക് മറഞ്ഞു. ഡെറാഡൂണിലെ കോർബറ്റ് ദേശീയോദ്യാനത്തിന് സമീപമായിരുന്നു സംഭവം.
60 കിലോമീറ്റർ വേഗത്തിൽ ഓടുകയായിരുന്ന ബൈക്കിന് നേർക്ക് കടുവ എടുത്ത് ചാടുകയായിരുന്നു. ബൈക്കിൽ രണ്ട് യാത്രക്കാരാണ് ഉണ്ടായിരുന്നത്. കടുവയുടെ ആക്രമണത്തിൽ ബൈക്ക് മറിഞ്ഞു. നിലത്ത് വീണ യുവാക്കളിൽ ഒരാളെയും കടിച്ചെടുത്ത് കടുവ കാട്ടിനുള്ളിലേക്ക് പോയി. അൽപ്പസമയത്തിനുള്ളിൽ, രണ്ടാമൻ എഴുന്നേറ്റ് സഹയാത്രികന് വേണ്ടി തിരച്ചിൽ നടത്തിയെങ്കിലും യുവാവിനെയോ കടുവയെയോ പ്രദേശത്ത് എവിടെയും കണ്ടില്ല. തുടർന്ന് ഇയാൾ ബൈക്കുമായി പോലീസ് സ്റ്റേഷനിൽ എത്തി സംഭവം വിവരിക്കുകയായിരുന്നു.
അഫ്സൽ എന്ന യുവാവിനെയാണ് കാണാതായത്. അനസ് എന്നാണ് രക്ഷപ്പെട്ടയാളിന്റെ പേര്. സംഭവത്തെ തുടർന്ന്, വനം വകുപ്പ് ഓഫീസിന് മുന്നിൽ നാട്ടുകാർ പ്രതിഷേധിച്ചു. പ്രദേശത്ത് മൂന്ന്- നാല് കടുവകൾ പതിവായി കറങ്ങി നടക്കുന്നുണ്ടെന്നും, ഇതിനെ കുറിച്ച് പരാതി നൽകിയിട്ടും അധികൃതർക്ക് അനക്കമില്ലെന്നും നാട്ടുകാർ ആരോപിച്ചു.
Comments