ന്യൂഡൽഹി: രാജ്യത്തിന്റെ പുതിയ രാഷ്ട്രപതി ദ്രൗപദി മുർമുവിനെ അഭിനന്ദിച്ച് നേപ്പാൾ പ്രധാനമന്ത്രി ഷെർ ബഹദൂർ ദ്യൂബ. ഫലപ്രഖ്യാപനത്തിന് പിന്നാലെ ട്വിറ്ററിലൂടെയായിരുന്നു അദ്ദേഹം അഭിനന്ദനങ്ങൾ നേർന്നത്. ദ്രൗപദി മുർമുവിന്റെ നേതൃത്വത്തിൽ ഇന്ത്യയും നേപ്പാളും തമ്മിലുള്ള ബന്ധം കൂടുതൽ ഉയരങ്ങളിൽ എത്തുമെന്നും ദ്യൂബ ട്വീറ്റ് ചെയ്തു.
ഇന്ത്യയുടെ 15ാമത് രാഷ്ട്രപതിയായി തിരഞ്ഞെടുക്കപ്പെട്ട ദ്രൗപദി മുർമുവിന് നേപ്പാൾ ജനതയുടെ ഭാഗമായി താൻ അഭിനന്ദനങ്ങൾ അറിയിക്കുന്നു. വരും ദിവസങ്ങളിൽ മുർമുവിന്റെ നേതൃത്വത്തിൽ ഇന്ത്യയും നേപ്പാളും തമ്മിലുള്ള നയതന്ത്ര ബന്ധം കൂടുതൽ ഉയരങ്ങളിൽ എത്തുമെന്ന് ആത്മവിശ്വാസം ഉണ്ടെന്നും ദ്യൂബ വ്യക്തമാക്കി.
രാത്രിയോടെയാണ് രാഷ്ട്രപതി തിരഞ്ഞെടുപ്പുമായി ബന്ധപ്പെട്ട അന്തിമ ഫലപ്രഖ്യാപനം ഉണ്ടായത്. തിരഞ്ഞെടുപ്പിൽ 6,76,803 വോട്ട് മൂല്യം നേടിയാണ് മുർമു വിജയിച്ചത്. 2824 വോട്ടുകൾ മുർമു സ്വന്തമാക്കി. 1877 വോട്ടുകളാണ് എതിർ സ്ഥാനാർത്ഥി യശ്വന്ത് സിൻഹ നേടിയത്. 3,80,177 ആണ് വോട്ട് മൂല്യം.
