തിരുവനന്തപുരം: ക്രൈം നന്ദകുമാറിനെതിരെ പരാതി നൽകിയ യുവതിയെ അപമാനിച്ച സംഭവത്തിൽ യൂട്യൂബർ പോലീസിൽ കീഴടങ്ങി. യൂട്യൂബർ സൂരജ് പാലാക്കാരനാണ് ഇന്ന് രാവിലെ പോലീസിന് മുൻപിൽ കീഴടങ്ങിയത്. സ്ത്രീത്വത്തെ അപമാനിച്ച കുറ്റത്തിനാണ് സൂരജ് പാലക്കാരനെതിരെ പോലീസ് കേസ് എടുത്തിരുന്നത്.
കേസിൽ മുൻകൂർ ജാമ്യം ആവശ്യപ്പെട്ട് സൂരജ് നൽകിയ അപേക്ഷ ഹൈക്കോടതി നേരത്തെ തള്ളിയിരുന്നു. ഇതിന് പിന്നാലെയാണ് പോലീസിൽ കീഴടങ്ങിയത്. എറണാകുളം സൗത്ത് ടൗൺ പോലീസാണ് ഇയാൾക്കെതിരെ കേസ് രജിസ്റ്റർ ചെയ്തിട്ടുള്ളത്.
നീതിന്യായ വ്യവസ്ഥയെ മാനിക്കുന്നുവെന്ന് കീഴടങ്ങിയ ശേഷം സൂരജ് പറഞ്ഞു. തെറ്റ് ചെയ്തതായി കരുതുന്നില്ല. സാധാരണക്കാരിൽ സാധാരണക്കാർക്ക് വേണ്ടിയാണ് എന്നും യൂട്യൂബ് ചാനലിലൂടെ സംസാരിച്ചിട്ടുള്ളത്. സമൂഹത്തിൽ മോശപ്പെട്ട ആളുകൾക്കെതിരെയാണ് മോശം പരാമർശങ്ങൾ നടത്താറുള്ളതെന്നും സൂരജ് പാലാക്കാരൻ പറഞ്ഞു.
ക്രൈം നന്ദകുമാറിനെതിരെ പരാതി നൽകിയ അടിമാലി സ്വദേശിനിയെ ആണ് സൂരജ് അപമാനിച്ചത്. പരാതിയിൽ യൂട്യൂബർക്കെതിരെ പട്ടിക ജാതി, പട്ടിക വർഗ്ഗ വകുപ്പുകൾ പ്രകാരമാണ് കേസ് എടുത്തിട്ടുള്ളത്.
Comments