ന്യൂഡൽഹി : പ്രധാനമന്ത്രി നരേന്ദ്ര മോദിയുടെ പ്രതി മാസ റേഡിയോ പരിപാടിയായ മൻ കി ബാത്തിന്റെ 91-ാം പതിപ്പിനെ ഇന്ന് അഭിസംബോധന ചെയ്യും. കഴിഞ്ഞ മാസത്തെ പരിപാടിയിൽ വ്യക്തമാക്കിയ വിഷയങ്ങളെ ഉൾക്കൊള്ളിക്കുന്ന ബുക്ക്‌ലെറ്റ് പങ്കിടുമെന്ന് പ്രധാനമന്ത്രി ട്വിറ്ററിൽ വ്യക്തമാക്കി. ബഹിരാകാശ രംഗത്തെ ഇന്ത്യൻ മുന്നേറ്റം, കായിക രംഗത്തെ കുതിപ്പ്, രഥയാത്ര തുടങ്ങിയ വിഷയങ്ങളാകും ബുക്ക്‌ലെറ്റിൽ ഉണ്ടാവുക.
കഴിഞ്ഞ മാസത്തെ പരിപാടിയിൽ 1975 ലെ അടിയന്തരാവസ്ഥയുടെ ഇരുണ്ട അദ്ധ്യയങ്ങളെ ഓർമ്മിപ്പിച്ചിരുന്നു. രാജ്യത്തിന്റെ ചരിത്രത്തിലെ തന്നെ ഭയനാകമായ സാഹചര്യത്തെ ചെറുത്ത് നിന്ന എല്ലാവരെയും അഭിനന്ദിക്കുകയും ചെയ്തു. ഭരണഘടനയുടെ ഇരുപത്തിയൊന്നാം അനുച്ഛേദം ഉറപ്പു നൽകുന്ന ജീവിക്കാനുള്ള അവകാശവും വ്യക്തി സ്വതന്ത്ര്യവും അക്കാലത്ത് ജനങ്ങൾക്ക് നിഷേധിച്ചിരുന്ന സമയത്തും അതിനു ശേഷവും ജനങ്ങൾക്ക് ജനാധിപത്യത്തിലുള്ള വിശ്വാസം നഷ്ടപ്പെട്ടില്ലെന്നും അദ്ദേഹം ചൂണ്ടിക്കാട്ടി. കോടതികൾ, ഭരണഘടന സ്ഥാപനങ്ങൾ,മാദ്ധ്യമങ്ങൾ തുടങ്ങിയവ നിയന്ത്രണത്തിലായെന്നും സെൻസർഷിപ്പ് ഏർപ്പെടുത്തിയത് വഴി അംഗീകാരമില്ലാതെ ഒന്നും പ്രസിദ്ധീകരിക്കാൻ കഴിയില്ലെന്നും അദ്ദേഹം വ്യക്തമാക്കി.
91-ാം പതിപ്പിൽ സംസാരിക്കാനുള്ള വിഷയങ്ങൾ സംബന്ധിച്ച് ജനങ്ങൾക്ക് നിർദേശങ്ങളും അഭിപ്രായങ്ങളും പങ്കുവെയ്‌ക്കാൻ അവസരം നൽകിയിരുന്നു. നമോ ആപ്പ് വഴിയോ MyGov ആപ്പ് വഴിയോ,1800-11-7800 എന്ന നമ്പറിലോ ബന്ധപ്പെടാനായിരുന്നു നിർദേശം.
