പാലക്കാട് വൻ സ്‌ഫോടക വസ്തു ശേഖരം; കണ്ടെടുത്തത് 8,000 ത്തോളം ജലാറ്റിൻ സ്റ്റിക്കുകൾ; പോലീസ് അന്വേഷണം ആരംഭിച്ചു

പാലക്കാട്: ഷൊർണൂരിൽ നിന്നും വൻ സ്‌ഫോടകവസ്തു ശേഖരം കണ്ടെടുത്തു. പട്ടാമ്പി ഓങ്ങല്ലൂർ വാടാനാംകുറുശ്ശിയിൽ നിന്നാണ് സ്ഫോടക വസ്തു ശേഖരം കണ്ടെത്തിയത്.

8000ത്തോളം ജലാറ്റീൻ സ്റ്റിക്കുകളാണ് കണ്ടെത്തിയത്. 40 ഓളം പെട്ടികളിലായാണ് ഇവ സൂക്ഷിച്ചിരുന്നത്. ഒരു പെട്ടിയിൽ 200 ഓളം ജലാറ്റിൻ സ്റ്റിക്കുകളാണ് ഉണ്ടായിരുന്നത്.വാടാനാംകുറുശ്ശി 10-ാം വാർഡിൽ പ്രവർത്തിക്കുന്ന ക്വാറിക്ക് സമീപത്ത് നിന്നുമാണ് ഇവ കണ്ടെത്തിയത്.

സ്‌ഫോടകവസ്തു നിറച്ച പെട്ടികൾ ശ്രദ്ധയിൽപ്പെട്ട നാട്ടുകാർ പോലീസിൽ വിവരം അറിയിക്കുകയായിരുന്നു. തുടർന്ന് പോലീസും തഹസിൽദാറുടെ നേതൃത്വത്തിലുള്ള റവന്യൂ സംഘവും സ്ഥലത്ത് പരിശോധന നടത്തി. സ്‌ഫോടക വസ്തുക്കൾ വഴിയോരത്ത് കണ്ടെത്തിയതിനെ തുടർന്ന് നാട്ടുകാർ ആശങ്കയിലായിരിക്കുകയാണ്. സംഭവത്തിൽ പോലീസ് അന്വേഷണം ആരംഭിച്ചു.