എറണാകുളം: മോശം കാലാവസ്ഥയെ തുടർന്ന് വിമാനങ്ങൾ നെടുമ്പാശ്ശേരിയിലേക്ക് വഴി തിരിച്ചു വിട്ടു. കരിപ്പൂരിൽ ഇറങ്ങേണ്ട ആറ് വിമാനങ്ങളാണ് നെടുമ്പാശ്ശേരി വിമാനത്താവളത്തിൽ ഇറക്കിയത്. വടക്കൻ കേരളത്തിൽ മണിക്കൂറുകളായി അതി ശക്തമായ മഴ തുടരുകയാണ്.
ഗൾഫ് എയറിന്റെ ഷാർജയിൽ നിന്നുള്ള വിമാനം, ബഹറൈനിൽ നിന്നുള്ള വിമാനം, ഖത്തർ എയർവേസിന്റെ ദോഹയിൽ നിന്നുള്ള വിമാനം. എയർ ഇന്ത്യ എക്‌സ്പ്രസിന്റെ അബുദാബിയിൽ നിന്നുള്ള വിമാനം. എയർ അറേബ്യയുടെ ഷാർജയിൽ നിന്നുള്ള വിമാനം എന്നിവയാണ് നെടുമ്പാശ്ശേരിയിൽ ഇറക്കിയത്.
കരിപ്പൂരിലേത് ടേബിൾ ടോപ്പ് വിമാനത്താവളമാണ്. അതിനാൽ മോശം കാലാവസ്ഥയിൽ ഇവിടെ വിമാനങ്ങൾ ഇറക്കുക ദുഷ്‌കരമാണ്. ഈ സാഹചര്യത്തിലാണ് വിമാനങ്ങൾ നെടുമ്പാശ്ശേരിയിലേക്ക് വഴി തിരിച്ചു വിട്ടത്. കാലാവസ്ഥ അനുകൂലമായാൽ ഈ വിമാനങ്ങൾ കരിപ്പൂരിലേക്ക് തിരിക്കും. അല്ലാത്ത പക്ഷം യാത്രികർക്ക് മറ്റ് സൗകര്യങ്ങൾ ഒരുക്കി നൽകുമെന്ന് അധികൃതർ അറിയിച്ചു.
