രാജ്യത്തെ ഉയർന്ന ഭരണഘടനാ പദവികളിൽ ഒന്നാണ് ഉപരാഷ്ട്രപതി . പാർലമെന്റിന്റെ അദ്ധ്യക്ഷനെന്ന നിലയിൽ സഭയെ നയിക്കാനുള്ള ഉത്തരവാദിത്വവും ഈ പദവിയിൽ ഇരിക്കുന്ന വ്യക്തിയിൽ നിക്ഷിപ്തമാണ്. രാഷ്ട്രപതിയുടെ അഭാവത്തിൽ അദ്ദേഹത്തിന്റെ ചുമതലക്കാരനായും ഈ വ്യക്തി പ്രവർത്തിക്കുന്നു. ഇതൊക്കെയാണെങ്കിലും ഉപരാഷ്ട്രപതിയുടെ ശമ്പളവും മറ്റ് ആനുകൂല്യങ്ങളും എന്തൊക്കെയാണെന്ന് അധികമാർക്കും അറിയില്ല.
പാർലമെന്റ് ഓഫീസേഴ്സ് നിയമത്തിലെ നിർദ്ദിഷ്ട ചട്ടപ്രകാരമാണ് ഉപരാഷ്ട്രപതിക്ക് ശമ്പളവും ആനുകൂല്യങ്ങളും നൽകുന്നത്. 4 ലക്ഷം രൂപയാണ് ഉപരാഷ്ട്രപതിയുടെ പ്രതിമാസ ശമ്പളം. ശമ്പളത്തിന് പുറമേ, ഉപരാഷ്ട്രപതിക്ക് വിവിധ തരത്തിലുള്ള ദൈനംദിന അലവൻസുകളും ലഭിക്കുന്നുണ്ട്. സൗജന്യ വൈദ്യസഹായം, സൗജന്യ യാത്ര , ലാൻഡ്ലൈൻ കണക്ഷൻ, മൊബൈൽ ഫോൺ സേവനം എന്നിവ മറ്റ് ആനുകൂല്യങ്ങളിൽ ഉൾപ്പെടുന്നു. ഉപരാഷ്ട്രപതിക്കും സുരക്ഷാ ജീവനകാരുണ്ട്.
അതേസമയം രാഷ്ട്രപതിയുടെ അഭാവത്തിൽ ഉപരാഷ്ട്രപതി ഈ ചുമതലകൾ നിർവഹിക്കുകയാണെങ്കിൽ, രാഷ്ട്രപതിയുടെ ശമ്പളവും ആനുകൂല്യങ്ങളും ഈ പദവിയിൽ ഇരിക്കുന്നവർക്ക് ലഭിക്കും. ലഭിക്കുന്ന ശമ്പളത്തിന്റെ 50 ശതമാനമാണ് പെൻഷനായി ഉപരാഷ്ട്രപതി സ്വീകരിക്കുന്നത്. പെൻഷന് പുറമെ വിവിധ ആനുകൂല്യങ്ങളും ഇവർക്ക് ലഭിക്കുന്നു. ഉപരാഷ്ട്രപതിക്ക് ശമ്പളവും പെൻഷനും നൽകേണ്ട ചുമതല ധനമന്ത്രാലയത്തിനാണ്.
അഞ്ച് വർഷത്തേക്കാണ് കാലാവധി. അവരെ എത്ര തവണ വേണമെങ്കിലും പുനർനിയമിക്കാം. ഉപരാഷ്ട്രപതിയുടെ അഭാവത്തിൽ രാജ്യസഭയുടെ ചുമതലകൾ ഡെപ്യൂട്ടി ചെയർമാനാണ് കൈകാര്യം ചെയ്യുന്നത്. പ്രസിഡന്റ് ഭരണത്തിൽ ഇരിക്കെ മരിക്കുകയാണെങ്കിൽ ഉപരാഷ്ട്രപതിക്ക് ആ സ്ഥാനത്തേക്ക് മാറാൻ സാധിക്കും . എന്നാൽ ആറുമാസം മാത്രമേ ഈ പദവി വഹിക്കാൻ സാധിക്കുകയുള്ളൂ. പിന്നാലെ പുതിയ പ്രസിഡന്റിനെ തിരഞ്ഞെടുക്കണം. 35 വയസ്സിനു മുകളിലുള്ള ഏതൊരു ഇന്ത്യൻ പൗരനും ഉപരാഷ്ട്രപതി ആകാൻ അർഹതയുണ്ട്.
Comments