ചെന്നൈ: മുല്ലപ്പെരിയാർ അണക്കെട്ടിൽ ആശങ്കവേണ്ടെന്ന് കേരളത്തിനോട് തമിഴ്നാട്. കഴിഞ്ഞ ദിവസം തമിഴ്നാട് മുഖ്യമന്ത്രി എം.കെ സ്റ്റാലിന് മുഖ്യമന്ത്രി പിണറായി വിജയൻ നൽകിയ കത്തിനുള്ള മറുപടിയിലാണ് തമിഴ്നാട് ഇക്കാര്യം വ്യക്തമാക്കിയത്. എല്ലാം കൊണ്ടും അണക്കെട്ട് സുരക്ഷിതമാണെന്നും കത്തിൽ പറയുന്നു.
കേരളത്തിലെ ജനങ്ങൾ ആശങ്കപ്പെടേണ്ട സാഹചര്യമില്ല. മുല്ലപ്പെരിയാർ അണക്കെട്ട് സുരക്ഷിതമാണ്. 2021 ലെ കേന്ദ്ര ജല കമ്മീഷന്റെ നിർദ്ദേശപ്രകാരമുള്ള റൂൾ കർവിൽ വെള്ളം നിലനിർത്തും. ഓഗസ്റ്റ് ആദ്യവാരം അണക്കെട്ടിന്റെ വൃഷ്ടി പ്രദേശത്ത് ലഭിച്ച മഴ താഴ്ഭാഗത്ത് ലഭിച്ച മഴയേക്കാൾ കുറവാണ്.
ഓഗസ്റ്റ് നാലിന് അണക്കെട്ടിലെ ജലനിരപ്പ് 136 സെന്റീമീറ്റർ ആയിരുന്നു. ഇതോടെ 7.40ന് സ്പിൽവേ ഷട്ടറുകൾ തുറക്കുന്നതുമായി ബന്ധപ്പെട്ട വിവരം സർക്കാരിനെയും, ഇടുക്കി ജില്ലാ കളക്ടറെയും അറിയിച്ചു. ഇത് പ്രകാരം അഞ്ചാം തിയതി ഉച്ചയ്ക്ക് ഷട്ടറുകൾ തുറന്നുവെന്നും കത്തിൽ വ്യക്തമാക്കുന്നു.
കേരളത്തിന്റെ സുരക്ഷ ഉറപ്പു വരുത്തുന്നതിൽ എന്നും തങ്ങളുടെ അണക്കെട്ട് സുരക്ഷാ അധികൃതർ ശ്രദ്ധാലുക്കളാണ്. ഇവർ അടിക്കടി സ്ഥിതിഗതികൾ കേരളത്തെ അറിയിക്കുന്നുണ്ടെന്നും കത്തിൽ പറയുന്നുണ്ട്.
Comments