കൊച്ചി: കിഫ്ബിക്കെതിരായ ഇഡി അന്വേഷണത്തിനെതിരെ ഹൈക്കോടതിയിൽ ഹർജി നൽകി എൽഡിഎഫ് എംഎൽഎമാർ. 5 എംഎൽഎമാർ ചേർന്നാണ് ഹൈക്കോടതിയിൽ ഹർജി നൽകിയത്. ഇഡി ഇടപെടൽ വികസനപ്രവർത്തനങ്ങളെ ബാധിക്കുന്നുവെന്നും കിഫ്ബിയെ തകർക്കാനാണ് ശ്രമമെന്നും ഹർജിയിൽ ചൂണ്ടിക്കാട്ടുന്നു. ഹർജി നാളെ ഹൈക്കോടതി പരിഗണിക്കും.
ഇഡിയുടേത് അനാവശ്യമായ കടന്നുകയറ്റമാണെന്നാണ് എംഎൽമാരുടെ ആരോപണം. കെ.കെ ശൈലജ, ഐ.ബി സതീഷ്, എം മുകേഷ്, ഇ.ചന്ദ്രശേഖരൻ, കടന്നപ്പള്ളി രാമചന്ദ്രൻ എന്നിവർ ചേർന്നാണ് പൊതുതാൽപര്യ ഹർജിനൽകിയത്. ചീഫ് ജസ്റ്റിസ് എസ് മണികുമാർ അദ്ധ്യക്ഷനായ ബെഞ്ചാണ് കേസ് പരിഗണിക്കുക.
അതേസമയം ഇഡിയുടെ സമൻസ് പിൻവലിക്കണമെന്ന് ആവശ്യപ്പെട്ട് മുൻ ധനമന്ത്രി തോമസ് ഐസക് ഹൈക്കോടതിയിൽ ഹർജി നൽകി. സമൻസുകൾ നിയമവിരുദ്ധമാണെന്നും താൻ ചെയ്ത കുറ്റമെന്താണെന്ന് വ്യക്തമാക്കാത്ത ഇഡിയുടെ നടപടികൾ ശരിയല്ലെന്നും ചൂണ്ടിക്കാട്ടിയാണ് തോമസ് ഐസക് ഹർജി നൽകിയത്.
Comments