മിക്കവർക്കും ഇഷ്ടപ്പെട്ട ഒരു ഫലമാണ് നേന്ത്രപ്പഴം. മലയാളികൾ മിക്കവരും പതിവായി നേന്ത്രപ്പഴം കഴിക്കുന്നവരുമാണ്. പോഷക സമൃദ്ധമായ ഈ ഫലം പെട്ടെന്ന് വിശപ്പകറ്റാനും സഹായിക്കുമെന്നതിനാൽ നേന്ത്രപ്പഴത്തിന് നിരവധി ആരാധകരുണ്ട്. ഒട്ടനവധി ആരോഗ്യ ഗുണങ്ങൾ കൂടി അടങ്ങിയ ഒരു ഫലമാണ് നേന്ത്രപ്പഴം. അവ എന്തെല്ലാമാണെന്ന് നോക്കാം..
ഒരു ഇടത്തരം നേന്ത്രപ്പഴം കഴിച്ചാൽ അതിൽ നിന്നും 450 മില്ലിഗ്രാം പൊട്ടാസ്യം നമുക്ക് ലഭിക്കുന്നു. നമ്മുടെ ശരീരത്തിന്റെ പ്രവർത്തനങ്ങൾക്കാവശ്യമായ 13 ശതമാനം പൊട്ടാസ്യം ഇത്തരത്തിൽ ലഭിക്കും. ഹൃദയാരോഗ്യത്തിന് അത്യന്താപേക്ഷിതമായ ഒന്നാണ് പൊട്ടാസ്യം. രക്തസമ്മർദ്ദത്തെ നിയന്ത്രിക്കാൻ പൊട്ടാസ്യത്തിന് കഴിയുമെന്നാണ് പറയപ്പെടുന്നത്. അതിനാൽ ദിവസവും ഓരോ നേന്ത്രപ്പഴം കഴിക്കുന്നത് ഹൃദയത്തിന്റെ ആരോഗ്യത്തെ സംരക്ഷിക്കാൻ സഹായിക്കുന്നു.
അൾസർ മൂലമുള്ള ആരോഗ്യ പ്രശ്നങ്ങളെ നിയന്ത്രിക്കുക, എല്ലിന് ബലം നൽകുക, സന്ധിവാതത്തെ ചെറുക്കുക എന്നിവയും നേന്ത്രപ്പഴത്തിന്റെ ആരോഗ്യഗുണങ്ങളാണ്. ഇതുകൂടാതെ മലബന്ധത്തെ പ്രതിരോധിക്കാനും നേന്ത്രപ്പഴത്തിന് സാധിക്കും. എന്നാൽ പഴുപ്പ് കുറവുള്ള പഴം കഴിക്കുന്നത് ചിലപ്പോൾ ദഹനപ്രശ്നങ്ങൾക്ക് കാരണമായേക്കാം. അതിനാൽ പഴുത്ത നേന്ത്രപ്പഴമോ വേവിച്ച നേന്ത്രപ്പഴമോ കഴിക്കാൻ ശ്രദ്ധിക്കുക.
നേന്ത്രപ്പഴത്തിലെ ഘടകങ്ങൾ അനീമിയയെ ചെറുക്കാൻ ഫലം ചെയ്യും. ഇതുകൂടാതെ സ്ത്രീകൾക്ക് ആർത്തവകാലത്തുണ്ടാകുന്ന പ്രശ്നങ്ങളെ തടയാനും നേന്ത്രപ്പഴം സഹായിക്കും. ഏകദേശം 90 കലോറി ഒരു നേന്ത്രപ്പഴത്തിൽ അടങ്ങിയിട്ടുണ്ടെന്നാണ് പറയപ്പെടുന്നത്. അതുകൂടാതെ ധാരാളം പ്രോട്ടീനും ഫൈബറുകളും ഈ പഴത്തിൽ അടങ്ങിയിട്ടുണ്ട്. അതേസമയം കൊഴുപ്പ് കുറവുമാണ്. അതിനാൽ തടി കുറയ്ക്കാൻ ആഗ്രഹിക്കുന്നവരും ആരോഗ്യമുള്ള ശരീരത്തെ വാർത്തെടുക്കാൻ താൽപര്യപ്പെടുന്നവരും ദിവസവും നേന്ത്രപ്പഴം കഴിക്കുന്നത് ഉത്തമമാണ്.
Comments