ദുബായ്: യുഎഇയിലെ പ്രവാസികൾ വിവാഹിതരാകുമ്പോൾ എമിറേറ്റ്സ് ഐഡി കാർഡുകൾ മാറ്റുകയോ പുതുക്കുകയോ ചെയ്യണമെന്ന് ഫെഡറൽ അതോറിറ്റി ഫോർ ഐഡന്റിറ്റി സിറ്റിസൺഷിപ്പ് കസ്റ്റംസ് ആൻഡ് പോർട്ട്സ് സെക്യൂരിറ്റി അധികൃതർ അറിയിച്ചു. ഭാര്യയുടെ കുടുംബപ്പേര് വിവാഹശേഷം മാറ്റുന്നവർക്കാണ് ഇതുബാധകം.
കുടുംബപ്പേര് വിവാഹശേഷം മാറ്റുന്നവർ എമിറേറ്റ്സ് ഐഡി കാർഡുകൾ മാറ്റുകയോ പുതുക്കുകയോ ചെയ്യണം. ബന്ധപ്പെട്ട വ്യക്തി മാനവവിഭവശേഷി മന്ത്രാലത്തിന്റെ ഉപഭോക്തൃ സേവന കേന്ദ്രം സന്ദർശിക്കുകയും ഐഡി കാർഡിലെയും പോപ്പുലേഷൻ റജിസ്റ്റർ പ്രോഗ്രാമിലെയും ഡാറ്റ അപ്ഡേറ്റ് ചെയ്യുന്നതിന് ആവശ്യമായ രേഖകൾ ഹാജരാക്കുകയും ചെയ്യണമെന്ന് അതോറിറ്റി അറിയിച്ചു.
ഗൾഫ് പൗരന്മാരുടെ കാര്യത്തിൽ മകനോ മകൾക്കോ 15 വയസ് തികഞ്ഞ് 30 ദിവസത്തിനുള്ളിൽ ജനസംഖ്യാ റജിസ്റ്റർ പ്രോഗ്രാമിലെയും ഐഡി കാർഡിലെയും ഡാറ്റ അപ്ഡേറ്റ് ചെയ്യണം. ഇതിനായി ഉപഭോക്തൃ സേവന കേന്ദ്രം സന്ദർശിക്കുകയും മക്കളുടെ വിരലടയാളം എടുക്കാനും ആവശ്യമായ എല്ലാ ഡാറ്റയും അപ്ഡേറ്റ് ചെയ്യാൻ അപേക്ഷിക്കുകയും വേണം. എന്നാൽ യുഎഇ നിവാസികൾ തങ്ങളുടെ മക്കൾക്ക് 15 വയസ് തികയുമ്പോൾ അധികൃതരെ സമീപിക്കേണ്ട ആവശ്യമില്ല. റസിഡൻസി പുതുക്കുമ്പോൾ അപ്ഡേറ്റ് ചെയ്യുന്നതാണ് ഇതിന് കാരണം.
