എറണാകുളം : നെടുമ്പാശ്ശേരി വിമാനത്താവളത്തിൽ രണ്ട് കസ്റ്റംസ് ഉദ്യോഗസ്ഥർക്ക് സസ്പെൻഷൻ. സ്വർണക്കടത്തിന് സഹായിച്ച ഉദ്യോഗസ്ഥർക്കാണ് സസ്പെൻഷൻ ലഭിച്ചത്. ഡ്യൂട്ടിയിലുണ്ടായിരുന്ന ഉദ്യോഗസ്ഥരാണ് ഇരുവരും. കള്ളക്കടത്ത് സ്വർണ്ണവുമായി എത്തിയ യാത്രക്കാരനെയാണ് ഇവർ സഹായിച്ചതെന്നാണ് കണ്ടെത്തൽ.
വിമാനത്താവളം വഴി സൗദി അറേബ്യയിൽ നിന്ന് സ്വർണം കടത്തിയ സംഘത്തെ കസ്റ്റംസ് പ്രിവന്റീവ് വിഭാഗം പിടികൂടിയിരുന്നു. ഇതിന്റെ അടിസ്ഥാനത്തിൽ നടത്തിയ അന്വേഷണത്തിലാണ് ഉദ്യോഗസ്ഥർ വിമാനത്താവളത്തിന് പുറത്തേക്ക് സ്വർണം എത്തിക്കാം എന്ന് പറഞ്ഞതായും കൈക്കൂലി ആവശ്യപ്പെട്ടതായും അറസ്റ്റിലായവർ വെളിപ്പെടുത്തിയത്.
തുടർന്നാണ് കസ്റ്റംസ് പ്രിവന്റിവ് വിഭാഗം രണ്ട് ഉദ്യോഗസ്ഥർക്കെതിരെയും നടപടി എടുത്തത്. ഇതുവരെ ഒരു കോടിയോളം രൂപയുടെ സ്വർണം ഇത്തരത്തിൽ കടത്തിയെന്നാണ് പ്രിവന്റിവ് വിഭാഗം കണ്ടെത്തിയിരിക്കുന്നത്. തുടർന്നുള്ള അന്വേഷണം നടക്കുകയാണ്.
