രാജ്യം 76-ാം സ്വാതന്ത്ര്യ ദിനം ആഘോഷിക്കുമ്പോൾ ആശംസകളുമായി ചലച്ചിത്ര താരങ്ങൾ രംഗത്ത്. മോഹൻ ലാൽ, മമ്മൂട്ടി തുടങ്ങി നിരവധി പേർ ആശംസകൾ അറിയിച്ചു. സമൂഹമാദ്ധ്യമങ്ങൾ വഴിയാണ് ഇവർ ആശംസകൾ നേർന്നത്. മലയാള സിനിമ മേഖലയിലെ താരങ്ങൾക്ക് പുറമെ മറ്റു ഭാഷകളിലെ താരങ്ങളും ആശംസകൾ അറിയിച്ച് എത്തിയിരുന്നു.
സ്വാതന്ത്ര്യത്തിന്റെ 75-ാം വാർഷികമായ ആസാദി കാ അമൃത് മഹോത്സവത്തിന്റെ ഭാഗമായി സംഘടിപ്പിച്ച ഹർ ഘർ തിരംഗ ക്യാപെയ്നിലും താരങ്ങൾ പങ്കാളികളായിരുന്നു. ഇതിന്റെ ഭാഗമായി എളമക്കരയിലെ വീട്ടിൽ മോഹൻലാലും കൊച്ചിയിലെ വസതിയിൽ മമ്മൂട്ടിയും പതാക ഉയർത്തി.
‘ ഹർ ഘർ തിരംഗ രാജ്യ സ്നേഹം ഊട്ടിയുറപ്പിക്കാനും ഒന്നായി മുന്നേറാനും സഹായിക്കുമെന്ന് പതാക ഉയർത്തിയ ശേഷം മോഹൻലാൽ പറഞ്ഞു. ഇവർക്ക് പുറമെ സുരേഷ് ഗോപി, ജയറാം തുടങ്ങി നിരവധി പേർ വീടുകളിൽ പതാക ഉയർത്തിയിരുന്നു.
കഴിഞ്ഞ 13 മുതലാണ് ‘ഹർ ഘർ തിരംഗ’ ക്യാപെയ്ൻ ആരംഭിച്ചത്. സ്വാതന്ത്ര്യ ദിനം വിപുലമായി ആഘോഷിക്കുന്നതിനൊപ്പം രാജ്യത്തെ എല്ലാ വീടുകളിലും ത്രിവർണ്ണ പതാക ഉയർത്തുക എന്ന ലക്ഷ്യവും ഇതിന് ഉണ്ടായിരുന്നു. കേന്ദ്ര ആഭ്യന്തര മന്ത്രാലയത്തിന്റെ നേതൃത്വത്തിലുള്ള പരിപാടി സംസ്ഥാനങ്ങളിൽ മുഖ്യമന്ത്രിമാരും, കേന്ദ്ര ഭരണ പ്രദേശങ്ങളിൽ ലെഫ്റ്റനൻറ് ഗവർണർമാരുമാണ് നേതൃത്വം നൽകിയത്.
