പാലക്കാട്: സിപിഎം ബ്രാഞ്ച് സെക്രട്ടറിയും മരുതറോഡ് ലോക്കൽ കമ്മിറ്റി അംഗവുമായ ഷാജഹാനെ വെട്ടിക്കൊലപ്പെടുത്തിയ കേസിൽ നാല് പ്രതികൾ കൂടി അറസ്റ്റിൽ. കൊട്ടേക്കാട് സ്വദേശികളായ വിഷ്ണു, സുനീഷ്, ശിവരാജൻ, സതീഷ് എന്നിവരാണ് അറസ്റ്റിലായത്. ഇതുകൂടാതെ പ്രതികൾക്ക് ആയുധം എത്തിക്കാൻ സഹായിച്ചവരെയും പോലീസ് കസ്റ്റഡിയിലെടുത്തിട്ടുണ്ട്. നാല് പേരെയാണ് പുതിയതായി കസ്റ്റഡിയിലെടുത്തത്.
വെട്ടിക്കൊലപ്പെടുത്തിയ പ്രതികൾ ഉൾപ്പെടെ നാല് പേരെ ഇന്നലെ പോലീസ് അറസ്റ്റ് ചെയ്തിരുന്നു. കൊലയുടെ സൂത്രധാരനായി കണക്കാക്കുന്ന നവീൻ (28), ഷാജഹാനെ വെട്ടിയ ശബരീഷ് (30), അനീഷ് (29), സുജീഷ് (27) എന്നിവരാണ് ഇന്നലെ അറസ്റ്റിലായത്. പ്രതികൾ പാർട്ടിയിൽ നിന്ന് പുറത്തുപോയവരാണെന്നും ബ്രാഞ്ച് സെക്രട്ടറിയായതിലുള്ള വ്യക്തിവിരോധമാണ് കൊലപാതകത്തിലേക്ക് നയിച്ചതെന്നും പോലീസ് വ്യക്തമാക്കിയിരുന്നു.
ഇതിനിടെ പ്രധാന പ്രതിയായ നവീന്റെ ഫേസ്ബുക്ക് പ്രൊഫൈലും ഏറെ ചർച്ചയായി. പഴയ സിപിഎം പ്രവർത്തകരാണ് കൊലയ്‌ക്ക് പിന്നിലെന്ന് വാദിക്കുന്ന പാർട്ടിക്കും പോലീസിനും വിരുദ്ധമാണ് വസ്തുതകളെന്നാണ് പ്രൊഫൈലിലെ വിവരങ്ങൾ സൂചിപ്പിക്കുന്നത്. ഷാജഹാൻ കൊല്ലപ്പെട്ട ദിവസം രാവിലെയും പ്രധാന പ്രതിയായ നവീൻ, കോടിയേരി ബാലകൃഷ്ണനെ പ്രകീർത്തിച്ച് പോസ്റ്റിട്ടിരുന്നു. നിലവിൽ കേസിൽ അന്വേഷണം പുരോഗമിക്കുകയാണെന്നും കൂടുതൽ വിശദാംശങ്ങൾ ഇനിയും പുറത്തുവരാനുണ്ടെന്നുമുള്ള നിഗമനത്തിലാണ് പോലീസ്.
