ലളിത്പുർ: ഭഗവാൻ ശ്രീകൃഷ്ണന്റെ ജന്മദിനത്തോടനുബന്ധിച്ച് നേപ്പാളിൽ വിപുലമായ പരിപാടികൾ നടന്നു. ഓടക്കുഴലും തിരുമുടിയും വേഷങ്ങളും അണിഞ്ഞ നിരവധി ഉണ്ണിക്കണ്ണന്മാരും ഗോപികമാരും ഘോഷയാത്രയുടെ ഭാഗമായി പങ്കെടുത്തു. നേപ്പാൾ ജനത ദ്വാപരയുഗത്തിന്റെ പുണ്യം വിളിച്ചോതിയ ഭഗവൻ ശ്രീകൃഷ്ണന്റെ ജന്മദിനം പ്രൗഢ ഗംഭീരമായി ആഘോഷിച്ചു.
കൃഷ്ണാഷ്ടമി ദിനത്തിൽ യുനെസ്കോയുടെ പട്ടികയിൽ ഇടം നേടിയ കാഠ്മണ്ഡു താഴ്വരകൾ നൃത്ത ചുവടുകൾ കൊണ്ട് വർണ്ണ വിസ്മയം തീർത്ത ഉണ്ണിക്കണ്ണൻമാരെയും ഗോപികമാരെയും കൊണ്ട് നിറഞ്ഞു. ജന്മാഷ്ടമിയോടനുബന്ധിച്ച് നടന്ന ഘോഷയാത്രയിൽ നൂറുകണക്കിന് കൃഷ്ണ വേഷധാരികളൂം അമ്മമാരും ജനങ്ങളും പങ്കെടുത്തു.
ഉറിയടി മത്സരങ്ങൾ, ടാബ്ലോ, നൃത്തം തുടങ്ങി വിവിധങ്ങളായ പരിപാടികൾ അവതരിപ്പിച്ചപ്പോൾ നേപ്പാൾ താഴ്വരകൾ അക്ഷരാർത്ഥത്തിൽ അമ്പാടിയായി മാറുകയായിരുന്നു. ഹിന്ദു പൈതൃക മൂല്യങ്ങളെ സംരക്ഷിക്കുകയും അവയെ ആരാധിക്കുകയും ചെയ്യുന്ന നേപ്പാൾ ജനത ലോകത്തെ ഏറ്റവും വലിയ ഹിന്ദു രാഷ്ട്രം കൂടിയാണ്. ഘോഷയാത്രയുടെ പരിസമാപ്തി പാടാൻ ദർബാർ സ്ക്വയറിലെ ശ്രീകൃഷ്ണ ക്ഷേത്രത്തിൽ നടന്നു.
