ന്യൂഡൽഹി : എൻഫോഴ്സ്മെന്റ് ഡയറക്ടറേറ്റിന് വിശാല അധികാരം നൽകുന്ന വിധി പുനഃപരിശോധിക്കണമെന്ന ഉത്തരവിൽ ഭേദഗതി ആവശ്യപ്പെട്ട് ഇഡി സുപ്രീം കോടതിയിൽ. മുൻ ചീഫ് ജസ്റ്റിസ് എൻവി രമണയുടെ അദ്ധ്യക്ഷതയിലുള്ള ബെഞ്ചായിരുന്നു വിധി പുനഃപരിശോധിക്കുമെന്ന് വ്യക്തമാക്കിക്കൊണ്ട് ഉത്തരവ് പുറപ്പെടുവിച്ചത്. ഇതിൽ ഭേദഗതി ആവശ്യപ്പെട്ടുകൊണ്ടാണ് ഇഡി കോടതിയെ സമീപിച്ചിരിക്കുന്നത്.
ഇഡിക്ക് വിശാലമായ അധികാരം നൽകിക്കൊണ്ട് പുറപ്പെടുവിച്ച ഉത്തരവിലെ രണ്ട് വിഷയങ്ങളിലാണ് എൻവി രമണ പുനഃപരിശോധന വേണമെന്ന് അറിയിച്ചത്. ഇഡി തയാറാക്കുന്ന എൻഫോഴ്സ്മെന്റ് കേസ് ഇൻഫർമേഷൻ റിപ്പോർട്ട് (ഇസിഐആർ) കുറ്റാരോപിതന് നൽകേണ്ടതില്ലെന്ന വ്യവസ്ഥ, നിരപരാധിത്വം തെളിയിക്കേണ്ട ബാധ്യത കുറ്റാരോപിതരുടേതാകുന്ന വകുപ്പ് എന്നിവയിൽ പുനഃപരിശോധന ആവശ്യമാണെന്നും ബെഞ്ച് വ്യക്തമാക്കിയിരുന്നു. സുപ്രീം കോടതി വാക്കാലാണ് ഇക്കാര്യം അറിയിച്ചത്.
എന്നാൽ ഈ വിഷയങ്ങൾ ഉത്തരവിൽ വിശദീകരിച്ചിട്ടില്ല. ഉത്തരവിലെ ചുരുങ്ങിയത് രണ്ട് വിഷയങ്ങൾ പുനഃപരിശോധിക്കണമെന്ന് മാത്രമാണ് രേഖപ്പെടുത്തിയിരിക്കുന്നത്. ചുരുങ്ങിയത് എന്ന വാക്ക് ഉത്തരവിൽ നിന്ന് നീക്കം ചെയ്യണമെന്നാണ് ഇഡിയുടെ ആവശ്യം. പുനഃപരിശോധന ആവശ്യമാണെന്ന് ബെഞ്ച് വ്യക്തമാക്കിയ കാര്യങ്ങൾ ഉത്തരവിൽ രേഖപെടുത്തണമെന്നും ഇഡി ആവശ്യപ്പെട്ടിട്ടുണ്ട്.
