ന്യൂഡൽഹി: സ്വാതന്ത്ര്യ പ്രസ്ഥാനത്തിൽ പങ്കാളികളായ അറിയപ്പെടാത്ത ധീര യോദ്ധാക്കളുടെ കഥ പറയുന്ന പരമ്പര ‘സ്വരാജ്’ കാണാൻ ആഹ്വാനം ചെയ്ത് പ്രധാനമന്ത്രി നരേന്ദ്ര മോദി. പഠിക്കുന്ന സ്ഥാപനങ്ങളിൽ ദേശീയബോധം ജനിപ്പിക്കുന്ന പരിപാടികൾ സംഘടിപ്പിക്കാനും വിദ്യാർത്ഥികളോട് അദ്ദേഹം ആവശ്യപ്പെട്ടു. സ്വാതന്ത്ര്യ പോരാട്ടങ്ങളുടെ ഭാഗമായിരുന്ന വീരനായകന്മാരെ കുറിച്ച് അവബോധമുണ്ടാക്കാൻ ഇത്തരം പരിപാടികൾ സഹായിക്കുമെന്നും അദ്ദേഹം അഭിപ്രായപ്പെട്ടു.
പാർലമെൻ്റ് ലൈബ്രറി സമുച്ചയത്തിലെ ബാലയോഗി ഓഡിറ്റോറിയത്തിൽ ‘സ്വരാജ്’ പരമ്പരയുടെ പ്രത്യേക പ്രദർശനം ഓഗസ്റ്റ് 17ന് പ്രധാനമന്ത്രിക്കായി സംഘടിപ്പിച്ചിരുന്നു. ബിജെപി ദേശീയ അദ്ധ്യക്ഷൻ ജെ പി നഡ്ഡ, ലോക്സഭാ സ്പീക്കർ ഓം ബിർള തുടങ്ങിയവരും പ്രധാനമന്ത്രിക്കൊപ്പം പരിപാടി വീക്ഷിച്ചിരുന്നു. ദൂരദർശൻ നിർമ്മിച്ചിരിക്കുന്ന പരമ്പര എല്ലാ ഞായറാഴ്ചകളിലും രാത്രി 9.00ന് ദേശീയ ചാനലിലാണ് സംപ്രേഷണം ചെയ്യുന്നത്.
സ്വാതന്ത്ര്യ സമര ചരിത്രവും ഇന്ത്യാ ചരിത്രത്തിലെ വിസ്മരിക്കപ്പെട്ട ഏടുകളും ഉൾക്കൊള്ളിച്ചുള്ള പരമ്പരയാണ് സ്വരാജ്. 75 ഭാഗങ്ങളിലായാണ് പരമ്പര തയ്യാറാക്കിയിരിക്കുന്നത്. ഓഗസ്റ്റ് 14 മുതൽ സംപ്രേഷണം ആരംഭിച്ചിരിക്കുന്ന പരമ്പര ഹിന്ദിക്ക് പുറമെ തമിഴ്, തെലുങ്ക്, കന്നഡ, മലയാളം, മറാഠി, ഗുജറാത്തി, ഒറിയ, ബംഗാളി, അസമീസ് എന്നീ പ്രാദേശിക ഭാഷകൾക്ക് പുറമെ ഇംഗ്ലീഷിലും പ്രേക്ഷകർക്ക് മുന്നിൽ എത്തുന്നു.
