പാലക്കാട്: തൃത്താലയിൽ ഗണേശോത്സവം വിപുലമായി ആഘോഷിച്ച് വിശ്വഹിന്ദു പരിഷത്. വിവിധ ഭാഗങ്ങളിൽ നിന്നുള്ള ഗണേശ വിഗ്രഹങ്ങൾ വഹിച്ചുകൊണ്ടുള്ള നിമഞ്ജന ശോഭയാത്ര സംഘടിപ്പിച്ചു. ശോഭയാത്രയായി കൊണ്ടുപോയ ഗണേശ വിഗ്രഹങ്ങൾ ഭാരതപ്പുഴയിൽ നിമഞ്ജനം ചെയ്തു.
കപ്പൂർ, വാവനൂർ,കട്ടിൽമാടം ആനക്കര, ആലൂർ, മലറോഡ്, മേഴത്തൂർ, ഉള്ളന്നൂർ, കറുകപുത്തൂർ, പെരിങ്ങോട് തുടങ്ങി 12 ഓളം സ്ഥാനിയ സമിതികളിൽ നിന്നുള്ള വിഗ്രഹങ്ങൾ വഹിച്ചുകൊണ്ടായിരുന്നു ശോഭയാത്ര. സാംസ്കാരിക സമ്മേളന വേദിയായ മേഴത്തൂർ ശ്രീ പുല്ലാനിക്കാവ് ക്ഷേത്ര സന്നിധിയിൽ ശോഭയാത്ര സംഗമിച്ചു. ഇവിടെ നിന്ന് മഹാ നിമഞ്ജന ശോഭായാത്രയായി വെള്ളിയാങ്കല്ല് പൈതൃകപാർക്ക് സമീപത്തായി വിഗ്രഹങ്ങൾ ആരതി പൂജയോട് കൂടിയാണ് ഭാരതപ്പുഴയിൽ നിമഞ്ജനം ചെയ്തത്.
മേഴത്തൂർ പുല്ലാനികാവ് ക്ഷേത്രത്തിൽ നടന്ന സംസ്കാരിക സമ്മേളനം പ്രശസ്ത സിനിമാ താരം സന്തോഷ് കെ നായർ ഉദ്ഘാടനം ചെയ്തു. ഭാരതീയ വിചാരകേന്ദ്രം എറണാകുളം മേഖല സെക്രട്ടറി ഷാജി വരവൂർ മുഖ്യ പ്രഭാഷണം നടത്തി. വിശ്വ ഹിന്ദു പരിഷത് തൃത്താല പ്രഖണ്ഡ് പ്രസിഡന്റ് ടി. ഉണ്ണികൃഷ്ണൻ അദ്ധ്യക്ഷത വഹിച്ച ചടങ്ങിൽ ബി ജെ പി തൃത്താല മണ്ഡലം അദ്ധ്യക്ഷൻ ഒ.സ് ഉണ്ണികൃഷ്ണൻ സ്വാഗതവും മാതൃശക്തി സംയോജക ഷിജിനി ഷൈജു നന്ദിയും രേഖപ്പെടുത്തി.
വി രാമൻ കുട്ടി (ബിജെപി ദേശിയ നിർവാഹക സമിതി അംഗം ), സുനിൽദാസ് (രാഷ്ട്രീയ സ്വയം സേവക സംഘം തൃത്താല മണ്ഡലം കാര്യവാഹ് ), ദിനേശൻ എറവക്കാട് (ബിജെപി കപ്പൂർ മണ്ഡലം പ്രസിഡന്റ് ) കേശവൻ മാസ്റ്റർ, ഒ. കെ.എൻ നമ്പൂതിരി, ഗോപാലകൃഷ്ണൻ (ഹിന്ദു ഐക്യവേദി ) അഡ്വക്കേറ്റ് മനോജ്(ബിജെപി മണ്ഡലം ജനറൽ സെക്രട്ടറി), എ വി ഷൈജു (പ്രഖണ്ഡ് സെക്രട്ടറി )വിനീത് (ബജ്രംഗ്ദൾ സംയോജക് )ശശി കപ്പൂർ (ട്രെഷറർ) എന്നിവർ പരിപാടികളിൽ പങ്കെടുത്തു.
