ഷാർജ: ഏഷ്യാ കപ്പ് ക്രിക്കറ്റിൽ ബംഗ്ലാദേശിനെതിരെ മികച്ച ബൗളിംഗ് പ്രകടനം പുറത്തെടുത്ത് അഫ്ഗാനിസ്ഥാൻ. ടോസ് നേടി ബാറ്റിംഗ് തിരഞ്ഞെടുത്ത ബംഗ്ലാദേശിന് ഇരുപത് ഓവറിൽ 7 വിക്കറ്റ് നഷ്ടത്തിൽ 127 റൺസെടുക്കാനേ സാധിച്ചുള്ളൂ.
കഴിഞ്ഞ മത്സരത്തിൽ ശ്രീലങ്കയ്‌ക്കെതിരെ പുറത്തെടുത്ത മികച്ച പ്രകടനം അഫ്ഗാനിസ്ഥാൻ ബംഗ്ലാദേശിനെതിരെയും ആവർത്തിച്ചു. 3 വിക്കറ്റ് വീതമെടുത്ത സ്പിന്നർമാരായ മുജീബ് ഉർ റഹ്മാനും റാഷിദ് ഖാനുമാണ് ബംഗ്ലാദേശിനെ ചെറിയ സ്കോറിൽ ഒതുക്കിയത്. 48 റൺസ് എടുത്ത മൊസാദെക് ഹുസൈനാണ് ബംഗ്ലാദേശിന്റെ ടോപ് സ്കോറർ.
മറുപടി ബാറ്റിംഗിൽ അഫ്ഗാനിസ്ഥാൻ 3 ഓവർ പിന്നിടുമ്പോൾ വിക്കറ്റ് പോകാതെ 11 റൺസ് എടുത്തിട്ടുണ്ട്. ഓപ്പണർമാരായ ഹസ്രത്തുള്ള സസായും റഹ്മാനുള്ള ഗുർബാസുമാണ് ക്രീസിൽ.
