ക്രിക്കറ്റ് ആരാധകരുടെ ഇഷ്ടപ്പെട്ട താരമാണ് ഓസ്ട്രേലിയൻ ബാറ്റർ ഡേവിഡ് വാർണർ. എന്നാൽ ഇന്ത്യർക്കാർ ഡേവിഡ് വാർണറെ സ്നേഹിക്കുന്നത് ക്രിക്കറ്റ് താരം എന്ന നിലയിൽ മാത്രമല്ല, തങ്ങളുടെ രാജ്യത്തെയും സംസ്ക്കാരത്തെയും കലകളെയും ഇഷ്ടപ്പെടുന്ന വ്യക്തി എന്ന നിലയിൽ കൂടിയാണ്. ഇപ്പോഴിതാ, ഭാരതീയരും ലോകമൊട്ടാകെയുള്ള ഹൈന്ദവ വിശ്വാസികളും വിഘ്നവിനാശകനായ ഗണപതി ഭഗവാന്റെ ജന്മദിനമായ വിനായക ചതുർത്ഥി ആഘോഷിക്കുമ്പോൾ ആശംസയായി എത്തിയിരിക്കുകയാണ് ഡേവിഡ് വാർണർ.
‘ഇന്ത്യയിലെ എന്റെ എല്ലാ സുഹൃത്തുക്കൾക്കും ഗണേശ ചതുർത്ഥി ആശംസകൾ. നിങ്ങൾക്ക് ഒരുപാട് സന്തോഷം നേരുന്നു’ എന്നാണ് ഓസ്ട്രേലിയൻ ക്രിക്കറ്റ് താരം ഇൻസ്റ്റഗ്രാമിൽ കുറിച്ചിരിക്കുന്നത്. കുറിപ്പിനൊപ്പം ഗണപതി ഭഗവാന്റെ ചിത്രവും കൈകൂപ്പി പ്രാർത്ഥിക്കുന്ന താരത്തിന്റെ തന്നെ ചിത്രവും വാർണർ പങ്കുവെച്ചിട്ടുണ്ട്. താരത്തിന്റെ പോസ്റ്റിന് താഴെ ആരാധകരും വിശ്വാസികളും ആശംസകൾ നേരുകയാണ്.
ചിങ്ങ മാസത്തിലെ വെളുത്തപക്ഷ ചതുർത്ഥിയാണ് വിനായക ചതുർത്ഥി. ഈ ദിവസം വൈകുന്നേരം ചന്ദ്രനെ ദർശിക്കുന്നത് ശുഭകരമല്ല എന്നാണ് വിശ്വാസം. ചതുർത്ഥി കാണുക എന്ന പ്രയോഗം ഈ ഐതീഹ്യത്തിൽ നിന്നും ഉടലെടുത്തതാണ്. ചതുർത്ഥി ദിവസത്തിൽ ആരംഭിച്ച് അനന്ത ചതുർദശി വരെ നീണ്ടു നിൽക്കുന്ന പത്ത് ദിവസത്തെ ആഘോഷമാണ് ഗണേശോത്സവം.
Comments