തിരുവനന്തപുരം: കോൺഗ്രസ് അധ്യക്ഷ സ്ഥാനത്തേയ്ക്ക് ശശി തരൂർ എംപി മത്സരിക്കുമെന്ന വാർത്തകൾക്കിടെ അഭിപ്രായം വ്യക്തമാക്കി കെപിസിസി പ്രസിഡന്റ് കെ.സുധാകരൻ. അധ്യക്ഷ സ്ഥാനത്തേയ്ക്കുള്ള മത്സരത്തെപ്പറ്റിയുള്ള മാദ്ധ്യമ പ്രവർത്തകരുടെ ചോദ്യത്തിന് മറുപടി നൽകുകയായിരുന്നു അദ്ദേഹം. എഐസിസി പ്രസിഡൻറായി മത്സരിക്കാൻ ശശി തരൂർ യോഗ്യനാണെന്ന് കെ.സുധാകരൻ പറഞ്ഞു.
കോൺഗ്രസ് ഒരു ജനാധിപത്യ പാർട്ടിയാണ്. ശശി തരൂരിന് മത്സരിക്കാൻ ആഗ്രഹമുണ്ടെങ്കിൽ അദ്ദേഹം മത്സരിക്കട്ടെ എന്ന് സുധാകരൻ വ്യക്തമാക്കി. ജനാധിപത്യ പ്രക്രിയയിലൂടെ കോൺഗ്രസ് അധ്യക്ഷനെ കണ്ടെത്തുമെന്നും കൂടുതൽ വോട്ടു കിട്ടുന്നവർ വിജിയിക്കുമെന്നും അദ്ദേഹം പറഞ്ഞു. അതേസമയം, കോൺഗ്രസ് പ്രസിഡന്റ് തെരഞ്ഞെടുപ്പിൽ മത്സരിക്കുമോ എന്ന മാദ്ധ്യമ പ്രവർത്തകരുടെ ചോദ്യത്തിന് വ്യക്തമായ ഉത്തരം തരൂർ നൽകിയിരുന്നില്ല.
അധ്യക്ഷ തിരഞ്ഞെടുപ്പ് കോൺഗ്രസ് പാർട്ടിയുടെ നല്ലതിന് വേണ്ടിയാണെന്ന് മാത്രമായിരുന്നു ശശി തരൂർ പ്രതികരിച്ചത്. പാർട്ടി അധ്യക്ഷ സ്ഥാനത്തേക്ക് ഇല്ലെന്ന രാഹുലിന്റെ നിലപാട് നിരാശാജനകമാണെന്നും എന്നാൽ ഒരു കുടുംബത്തിലെ അംഗങ്ങൾ മാത്രമേ പാർട്ടിയെ നയിക്കൂ എന്ന നിലപാടിൽ കോൺഗ്രസ് ഒതുങ്ങരുതെന്നും ശശി തരൂർ ഒരു മലയാളം ദിനപത്രത്തിൽ എഴുതിയ ലേഖനത്തിൽ അഭിപ്രായപ്പെട്ടിരുന്നു.
Comments