കോഴിക്കോട്: ചാലിൽ താഴത്ത് ഓടിക്കൊണ്ടിരുന്ന കാറിന് തീ പിടിച്ചു. താമരത്താഴം സ്വദേശി ശ്രീജിത്തിന്റെ കാറിനാണ് തീപടർന്നത്. കാറിനുള്ളിൽ ഉണ്ടായിരുന്നവർ ഉടനെ പുറത്തിറങ്ങിയതിനാൽ വൻ ദുരന്തം ഒഴിവായി.
ഉച്ചയോടെയായിരുന്നു സംഭവം. ഗ്യാസ് ഗോഡൗണിന് സമീപമെത്തിയപ്പോഴായിരുന്നു തീപിടിത്തം ഉണ്ടായത്. വാഹനത്തിൽ നിന്നും തീയും പുകയും ഉയർന്നതോടെ എല്ലാവരും പുറത്തിറങ്ങുകയായിരുന്നു. തുടർന്ന് വിവരം ഫയർഫോഴ്സിനെ അറിയിച്ചു.
ശ്രീജിത്തും പ്രദേശവാസികളും ചേർന്ന് തീ അണയ്ക്കാൻ ശ്രമിച്ചെങ്കിലും ഫലം കണ്ടില്ല. ഫയർഫോഴ്സ് എത്തിയാണ് തീ അണച്ചത്. തീപിടിത്തത്തിൽ കാർ പൂർണ്ണമായും കത്തി നശിച്ചു.
