ജനീവ: ഇരട്ടത്തലയുള്ള ജാനസ് എന്ന കുഞ്ഞൻ ആമ 25 ാം പിറന്നാളിന്റെ നിറവിലാണ്.മനുഷ്യന്റെ കരുതൽ കൊണ്ട് മാത്രം പല പ്രതിസന്ധികളെയും അതിജീവിച്ച ആമയുടെ പിറന്നാൾ ആഘോഷപൂർവ്വം കൊണ്ടാടുകയാണ് ജനീവയിലെ നാച്വറൽ മ്യൂസിയത്തിലെ ആഞ്ചലിക്കയും സംഘവും.
ഇരട്ടത്തല മാത്രമല്ല ജാനസിന്റെ സവിശേഷതകൾ ഇരട്ട ഹൃദയവും ഇരട്ട ശ്വാസകോശവും ജാനസിനുണ്ട്. ശത്രുക്കൾ മുന്നിലെത്തുമ്പോൾ സാധാരണഗതിയിൽ ആമകൾക്ക് തല തോടിനുള്ളിലേക്ക് വലിച്ച് രക്ഷപെടാനുള്ള കഴിവുണ്ട്. എന്നാൽ ഇരട്ട തലയുള്ളതിനാൽ ജാനസിന് തല ഉള്ളിലേക്ക് വലിക്കാനാകില്ല.
മനുഷ്യൻ ജാനസിനു നൽകിയ പരിഗണനയും കരുതലുമാണ് ഇത്രയും വർഷം ആമയെ ജീവിക്കാൻ സഹായിച്ചത്. ഇടത്തേക്ക് നടക്കണോ വലത്തേക്ക് നടക്കണോയെന്ന കാര്യത്തിൽ പോലും ആശയക്കുഴപ്പം ഉണ്ടാകാറുണ്ട്. ഇങ്ങനെ തലകൾ തമ്മിൽ ചേർന്ന് ഉരഞ്ഞുണ്ടാകുന്ന മുറിവ് ഒഴിവാക്കാൻ വാസ്ലിൻ ഉപയോഗിച്ച് തലകൾ തടവി കൊടുക്കാറാണ് പതിവ്
2020ൽ ജാനസിന്റെ മൂത്രസഞ്ചിയിലെ കല്ല് ഓപ്പറേഷനിലൂടെ നീക്കം ചെയ്തിരുന്നു.പഴങ്ങളും ജൈവ പച്ചക്കറികളുമാണ് ജാനസിന്റെ ഭക്ഷണം. ഗ്രീൻ ടീയിലും ചമോമൈലിലുമാണ് ആമ കുളിക്കുന്നത്. ദിവസവും മസാജ് ചെയ്തു നൽകുകയും ചെയ്യും. കൂടാതെ ജാനസിനെ നടക്കാൻ കൊണ്ടുപോകാറുമുണ്ട്.
