രണ്ടര വർഷത്തിന് ശേഷം കളിക്കളത്തിൽ ഫോമിലെത്തിയ വിരാട് കോഹ്ലിക്ക് ആശംസകളുമായി എത്തിയത് നിരവധി പേരാണ്. കഴിഞ്ഞ കളികളിലെ മോശം പ്രകടനങ്ങൾ മൂലം അദ്ദേഹത്തിന് വിമർശനങ്ങൾ ധാരാളം കേൾക്കേണ്ടി വന്നിരുന്നു. ഭാര്യയും സിനിമാ താരവുമായ അനുഷ്‌കയ്‌ക്ക് നേരെയും ഇക്കാര്യത്തിൽ സൈബർ ആക്രമണങ്ങൾ ഉണ്ടായി. എന്നാൽ ഇതിനെ എല്ലാം വെല്ലുവിളിയായി സ്വീകരിച്ച് തന്റെ ബാറ്റ് കൊണ്ട് ഉത്തരം നൽകുന്ന വിരാട്ടിനെയാണ് കഴിഞ്ഞ ദിനസം ആരാകർ കളിക്കളത്തിൽ കണ്ടത്.
പിന്നാലെ താരത്തിനെ തേടിയെത്തിയത് ആശംസാ പ്രവാഹമായിരുന്നു. ഇപ്പോഴിതാ താരത്തെ പ്രശംസിച്ച് രംഗത്തെത്തിയിരിക്കുകയാണ് വ്യവസായി ആനന്ദ് മഹീന്ദ്ര. ട്വിറ്ററിലാണ് ആശംസ അറിയിച്ചിരിക്കുന്നത്. ‘യഥാർഥ ഹീറോകൾ തകർപ്പൻ പ്രഹരവുമായി അവസരത്തിനൊത്തുയരും. എതിർത്തുകൊണ്ടേയിരിക്കുന്നവർ തെറ്റാണെന്ന് അവർ തെളിയിക്കുക പ്രവർത്തിയിലൂടെയായിരിക്കും.’ എന്നായിരുന്നു അദ്ദേഹത്തിന്റെ ട്വീറ്റ്.
കഴിഞ്ഞ ദിവസം നടന്ന ഏഷ്യാ കപ്പിലെ സൂപ്പർ ഫോർ മത്സരത്തിലാണ് അഫ്ഗാനിസ്ഥാനെതിരെ കോഹ്ലിയുടെ സെഞ്ച്വറി മികവിൽ ഇന്ത്യ കൂറ്റൻ സ്‌കോർ നേടിയത്. ഓപ്പണർ ആയിറങ്ങിയ കോഹ്ലി 61 പന്തിൽ 122 റൺസുമായി പുറത്താകാതെ നിന്നിരുന്നു. 12 ഫോറും 6 സിക്‌സറുകളുമാണ് കളിയിൽ അദ്ദേഹം നേടിയത്.
