സൗത്ത് ഐലൻഡ്: തിമിംഗലവുമായി ബോട്ട് കൂട്ടിയിടിച്ച് ഉണ്ടായ അപകടത്തിൽ 5 പേർ മരിച്ചു. ന്യൂസിലാൻഡിലെ സൗത്ത് ഐലൻഡിലായിരുന്നു സംഭവം. തിമിംഗലവുമായി കൂട്ടിയിടിച്ച ബോട്ട് നിശ്ശേഷം തകർന്നതായി അന്താരാഷ്ട്ര മാദ്ധ്യമം റിപ്പോർട്ട് ചെയ്തു.
പക്ഷി നിരീക്ഷകരായ 11 യാത്രികരാണ് ബോട്ടിൽ ഉണ്ടായിരുന്നത്. ഇവരുമായി പോയ ബോട്ട് പ്രാദേശിക സമയം പകൽ 10.00നാണ് തിമിംഗലവുമായി കൂട്ടിയിടിച്ച് അപകടത്തിൽ പെട്ടത്. ഏഴ് മണിക്കൂർ നീണ്ടു നിന്ന രക്ഷാപ്രവർത്തനത്തിന് ശേഷമാണ് അപകടത്തിൽ പെട്ട ബോട്ടിൽ ഉണ്ടായിരുന്ന 6 പേരെ രക്ഷപ്പെടുത്തിയത്. ഇവർക്ക് ഗുരുതരമായി പരിക്കേറ്റിരുന്നു.
തിമിംഗലങ്ങൾ തീരത്തോട് അടുക്കുന്ന കാലമാണ് ഇതെങ്കിലും, ഇത്തരത്തിലുള്ള അപകടങ്ങൾ അപൂർവ്വമാണെന്ന് സൗത്ത് ഐലൻഡ് പോലീസ് പറഞ്ഞു. മേഖലയിൽ സ്പേം തിമിംഗലങ്ങൾ സാധാരണമാണ്. എന്നാൽ ഹമ്പ്ബാക്ക് തിമിംഗലമാകാം അപകടത്തിന് കാരണമെന്നാണ് പ്രാഥമിക നിഗമനമെന്നും പോലീസ് അറിയിച്ചു.
