കട്നി: അപകടത്തിൽപ്പെട്ട യുവാവിനെ ജെസിബിയുടെ കൈയിൽ കിടത്തി ആശുപത്രിയിലെത്തിച്ച് നാട്ടുകാർ. മധ്യപ്രദേശിലെ കട്നി ജില്ലയിലാണ് സംഭവം. ആംബുലൻസ് കൃത്യസമയത്ത് സ്ഥലത്ത് എത്താത്തതിനെ തുടർന്നാണ് അപകടത്തിൽ പരിക്കേറ്റയാളെ ഒരു പറ്റം യുവാക്കൾ ജെസിബിയിൽ ആശുപത്രിയിലെത്തിച്ചത്. ഇതിന്റെ വീഡിയോ സമൂഹമാദ്ധ്യമങ്ങളിൽ വൈറലാകുകയാണ്.
ബൈക്ക് അപകടത്തെ തുടർന്ന് പരിക്കേറ്റ യുവാവിനെ ആശുപത്രിയിലെത്തിക്കാൻ 108 ൽ വിളിച്ചെങ്കിലും ആംബുലൻസ് സേവനം ഉടൻ തന്നെ ലഭ്യമായില്ല. അടുത്തുള്ള പട്ടണത്തിൽ നിന്നും ആംബുലൻസ് എത്താൻ വളരെയധികം വൈകിയതോടെ യുവാക്കൾ പരിക്കേറ്റയാളെ ആശുപത്രിയിൽ എത്തിക്കുകയായിരുന്നുവെന്ന് ചീഫ് മെഡിക്കൽ ആൻഡ് ഹെൽത്ത് ഓഫീസർ പ്രദീപ് മുധിയ പറഞ്ഞു.
ഖിതൗലി റോഡിലാണ് അപകടം നടന്നതെന്ന് പ്രാദേശിക ജൻപാദ് പഞ്ചായത്ത് അംഗവും ജെസിബി ഉടമയുമായ പുഷ്പേന്ദ്ര വിശ്വകർമ പറഞ്ഞു. അപകടത്തിൽ യുവാവിന്റെ കാലുകൾക്ക് ഒടിവ് ഉണ്ടായി. ആശുപത്രിയിലെത്തിക്കാൻ ആംബുലൻസ് അന്വേഷിച്ചിട്ടും കൃത്യസമയത്ത് ലഭിച്ചില്ല. തുടർന്നാണ് പ്രദേശത്തെ ഓട്ടോ റിക്ഷാ ഡ്രൈവർമാരെയും സഹായത്തിന് കൂട്ടി തന്റെ ജെസിബിയിൽ പരിക്കേറ്റയാളെ ആശുപത്രിയിലെത്തിച്ചതെന്ന് പുഷ്പേന്ദ്ര വിശ്വകർമ വ്യക്തമാക്കി.
