ഷിയോപുർ: പ്രധാനമന്ത്രി നരേന്ദ്ര മോദിയുടെ ജന്മദിനത്തോടനുബന്ധിച്ച് കൂനോ ദേശീയ ഉദ്യാനത്തിൽ ചീറ്റകളെ തുറന്നു വിടാനെത്തിയ പ്രധാനമന്ത്രി നരേന്ദ്രമോദിയുടെ സ്റ്റൈൽ വൈറലാവുകയാണ്. നമീബിയയിൽ നിന്നും കൊണ്ട് വന്ന 8 ചീറ്റകളെ തുറന്നു വിടുന്നതിന്റെ ഭാഗമായാണ് അദ്ദേഹം ഷിയോപൂരിൽ എത്തിയത്.
ഫോട്ടോഗ്രഫിയോട് ഏറെ പ്രിയമുള്ള മോദി കുർത്തയ്‌ക്ക് മുകളിൽ വൈൽഡ് ലൈഫ് ഫോട്ടോഗ്രാഫർമാർ ധരിക്കുന്ന ജാക്കറ്റും തൊപ്പിയും ധരിച്ചാണ് എത്തിയത്. ചീറ്റകളെ തുറന്നു വിട്ടതിനു ശേഷം മദ്ധ്യപ്രദേശ് മുഖ്യമന്ത്രി ശിവരാജ് സിംഗ് ചൗഹാനോടൊപ്പം നിന്നാണ് ഡി എസ് എൽ ആർ ക്യാമറയിൽ ചിത്രങ്ങൾ പകർത്തിയത്.
പ്രത്യേകം തയ്യാറാക്കിയ സ്ഥലത്ത് കയറി നിന്ന് ചീറ്റകളെ തുറന്നു വിടുന്ന ദൃശ്യം ഇതിനോടകം വൈറലായി കഴിഞ്ഞു. വാക്കിലും, പ്രവൃത്തിയിലും, വസ്ത്രധാരണത്തിലും വേറിട്ട ചിന്താഗതി പുലർത്തുന്നതാണ് മോദിയെ വ്യത്യസ്തനാക്കുന്നത്. ഛത്തീസ്ഗഢിന്റെ തലസ്ഥാനമായ നയാ റായ്പൂരിലെ നന്ദൻ വാൻ ജംഗിൾ സഫാരി പാർക്ക് ഉദ്ഘാടനം ചെയ്ത ശേഷം കൂടിനു പിന്നിൽ നിന്ന് രാജകീയമായി തല ഉയർത്തി നിൽക്കുന്ന ഒരു ബംഗാൾ കടുവയുടെ ചിത്രം പകർത്തിയ കാഴ്ച മോദി ആരാധകർക്ക് ആവേശം പകരുന്നതായിരുന്നു. അതിന് തൊട്ടു പിന്നാലെയാണ് പുതിയ രൂപത്തിൽ അദ്ദേഹം എത്തിയിരിക്കുന്നത്.
