ഇടുക്കി: വണ്ടിപ്പെരിയാറിൽ മദ്ധ്യവയസ്കയായ സ്ത്രീയെ കടയിൽ അതിക്രമിച്ചു കയറി പീഡിപ്പിച്ച കേസിലെ പ്രതിയെ പോലീസ് അറസ്റ്റ് ചെയ്തു. അയ്യപ്പൻ കോവിൽ പാട്ടുംകൂട് സ്വദേശി പുത്തൻപുരയ്‌ക്കൽ വിനോദ് ജോസഫാണ് പിടിയിലായത്. വണ്ടിപ്പെരിയാർ പശുമല ആറ്റോരത്ത് താമസിക്കുന്ന യുവതിയാണ് പീഡനത്തിനിരയായത്.
വീടിന് സമീപം സ്ത്രീ പലചരക്ക് കട നടത്തുന്നുണ്ട്. രാത്രി ഏഴു മണിയോടെ കടയിലെത്തിയ വിനോദ് ജോസഫ് വീട്ടിലേക്കുള്ള സാധനങ്ങൾ ആവശ്യപ്പെട്ടു. സാധനങ്ങൾ എടുക്കാനായി കടയുടെ അകത്തേക്ക് കയറിയ സ്ത്രീയെ പുറകെ ചെന്ന് ഇയാൾ ക്രൂരമായി പീഡിപ്പിക്കുകയിരുന്നു. രക്ഷപെടാൻ ശ്രമിച്ചെങ്കിലും ഫലമുണ്ടായില്ല.
സ്ത്രീയുടെ വീടിനു മുകളിൽ വാടകയ്‌ക്ക് താമസിക്കുന്ന ആൾ രാത്രി എത്തിയപ്പോഴാണ് പീഡനത്തിനിരയായ വിവരം അറിഞ്ഞത്.
ഇയാൾ പോലീസിനെ വിവരം അറിയിക്കുകയും ഉടനെ ആശുപത്രിയിൽ പ്രവേശിപ്പിക്കുകയുമായിരുന്നു. സ്ത്രീയുമായി സംസാരിച്ചതിൽ നിന്നും പീഡിപ്പിച്ച ആളുടെ പേര് പറയുകയും തുടർന്ന് സി ഐ ഫിലിപ്പ് സാമിന്റെ നേതൃത്വത്തിലുള്ള സംഘം വിനോദ് ജോസഫിന്റെ വീട്ടിൽ എത്തി ഇയാളെ അറസ്റ്റ് ചെയ്യുകയായിരുന്നു. ഇയാൾക്കെതിരെ ബലാത്സംഗം , അതിക്രമിച്ചുകിടക്കൽ തുടങ്ങിയ വകുപ്പുകൾ ചുമത്തി കേസെടുത്തു.
