ജയ്പൂർ: തെരുവുനായയെ കാറിൽ ചങ്ങല കൊണ്ട് വലിച്ചിഴച്ച് ഡോക്ടർ. രാജസ്ഥാനിലെ ജോധ്പൂരിലാണ് സംഭവം.രജനീഷ് ഗാൽവ എന്നയാളാണ് തെരുവു നായയെ തന്റെ കാറിൽ കെട്ടിവലിച്ചിഴച്ചത്.മൃഗങ്ങൾക്കെതിരെയുളള ക്രൂരത നിയമപ്രകാരം ഡോക്ടർക്കെതിരെ കേസെടുത്തതായി പോലീസ് വ്യക്തമാക്കി.പ്രതി നായയെ റോഡിലൂടെ വലിച്ചിഴക്കുന്നതിന്റെ ദൃശ്യങ്ങൾ പുറത്തുവന്നിട്ടുണ്ട്.
കഴിഞ്ഞ ദിവസമാണ് കേസിനാസ്പദമായ സംഭവം നടന്നത്. തെരുവു നായയെ വലിച്ചിഴക്കുന്നത് കണ്ട ബൈക്കിലെത്തിയ മറ്റൊരു യാത്രക്കാരൻ ഡോക്ടറോട് കാർ നിർത്താൻ ആവശ്യപ്പെട്ടു. വാഹനം നിർത്തിയ ഉടനെ നായയെ രക്ഷിക്കുകയായിരുന്നു.
പിന്നീട് ഡോഗ് ഹോം ഫൗണ്ടേഷനെ വിവരം അറിയിച്ചു. നായയ്ക്ക് ഗുരുതരമായി പരുക്കേറ്റിട്ടുണ്ട്. തന്റെ വീടിന് സമീപത്താണ് തെരുവുനായ സ്ഥിരമായി താമസിക്കുന്നത്. അതിനെ അവിടെ നിന്ന് മാറ്റാനാണ് ശ്രമിച്ചതെന്നാണ് ഡോക്ടർ രജനീഷ് പോലീസിനോട് പറഞ്ഞത്.
