വർഷങ്ങൾ നീണ്ടു നിൽക്കുന്ന ചുഴലിക്കാറ്റുകൾ; വ്യാഴത്തിൽ നിന്നുള്ള മനോഹര ചിത്രം പങ്കുവച്ച് നാസ

കഴിഞ്ഞ ദിവസം നാസ പങ്കുവച്ച ചിത്രമാണ് ഇപ്പോൾ സമൂഹമാദ്ധ്യമങ്ങളിൽ തരംഗമാകുന്നത്. സൗരയൂഥത്തിലെ ഏറ്റവും വലിയ ഗ്രഹമായ വ്യാഴത്തിന്റെ ചിത്രങ്ങളാണിത്. വ്യാഴത്തിന്റെ ഉത്തരധ്രുവ മേഖലയിലായി നിരവധി ചുഴലിക്കാറ്റുകൾ ഉണ്ടാകുന്നതായി ചിത്രത്തിൽ കാണം. ജൂനോ ബഹിരാകാശ പേടകമാണ് ഈ മനോഹര ചിത്രം പകർത്തിയത്.

നിരവധി ചുഴലി കൊടുങ്കാറ്റുകൾ ഒരേസമയം ചിത്രത്തിൽ കാണാനാകും. വെള്ളയും നീലയും നിറങ്ങളിലാണ് ചുഴലിക്കാറ്റ് കാണാനാകുന്നത്. ചിത്രം പങ്കുവച്ച് നിമിഷങ്ങൾ കൊണ്ട് തന്നെ ദശലക്ഷക്കണക്കിന് ആളുകളാണ് ചിത്രം പങ്കുവയ്‌ക്കുകയും ലൈക്കടിക്കുകയും ചെയ്തിരിക്കുന്നത്. അതിശയകരമായ ചിത്രമെന്നാണ് പലരും ഈ പ്രതിഭാസത്തെ വിശേഷിപ്പിക്കുന്നത്.

വ്യാഴത്തിന്റെ ഏകദേശം 25,100 കിലോമീറ്റർ മുകളിൽ നിന്നാണ് ചിത്രം പകർത്തിയിരിക്കുന്നത്. വ്യാഴത്തിൽ ഉണ്ടാകുന്ന ചുഴലിക്കാറ്റുകൾ അതീവശക്തിയേറിയതായിരിക്കുമെന്നാണ് നാസ പറയുന്നത്. ഇവയ്‌ക്ക് അൻപത് കിലോമീറ്ററിലധികം ഉയരമുണ്ടാകും. മൈലുകൾ ദൂരത്തിൽ ഇവ വ്യാപിച്ച് കിടക്കുന്നുണ്ടാകും. വേഗത കുറയ്‌ക്കാനാകുന്ന തരം പ്രതലങ്ങൾ വ്യാഴത്തിൽ ഇല്ലാത്തതിനാൽ ഓരോ ചുഴലിക്കാറ്റിനും വർഷങ്ങളോളം ആയുസ്സ് ഉണ്ടാകും. മണിക്കൂറിൽ 539 കിലോമീറ്റർ വരെ വേഗതയിലാകും ഇവ വീശിയടിക്കുന്നത്.