ന്യുയോർക്ക്: ചൈന തായ്‌വാന് നേരെ നടത്തുന്ന അതിക്രമങ്ങൾ പരിധി വിട്ട സാഹചര്യത്തിൽ സൈനിക പിന്തുണ നൽകാനുറച്ച് അമേരിക്കൻ പ്രസിഡന്റ് ജോ ബൈഡൻ. ചൈനയുടെ പ്രതിരോധത്തിൽ തായ്‌വാനെ പോലൊരു ചെറു രാജ്യത്തിന് പിടിച്ച് നിൽക്കാൻ സാധ്യമല്ല. നിലനിൽപ്പിന് വേണ്ടി പൊരുതുന്ന തായ്‌വാന് പരസ്യ പിന്തുണയാണ് വൈറ്റ്ഹൗസിൽ നിന്നും ലഭിച്ചിരിക്കുന്നത്.
യുക്രെയ്ൻ റഷ്യ യുദ്ധത്തിലും അമേരിക്ക ഇടപെട്ടിരുന്നു. ബൈഡന്റെ പ്രസ്താവന തായ്‌വാനെ സംബന്ധിച്ച് ഏറെ ആശ്വാസം പകരുന്നതാണ്. കിഴക്കൻ ചൈനയുടെ തീരത്തുള്ള ഒരു സ്വയംഭരണ ദ്വീപായ തായ്‌വാനെ സംരക്ഷിക്കാൻ തയ്യാറാകുന്നതിലൂടെ ചൈനയുമായുള്ള ബന്ധത്തിൽ വിള്ളൽ ഉണ്ടാകുമെന്ന് വിശ്വസിക്കുന്നില്ലെന്ന് അമേരിക്കയുടെ നയതന്ത്ര വിദഗ്ധർ പറഞ്ഞു.
ചൈന തായ്‌വാൻ ദ്വീപിന് മുകളിൽ മിസൈൽ ആക്രമണം നടത്തുകയും അസ്വസ്ഥതകൾ ഉണ്ടാക്കുകയും ചെയ്യുന്നതായി മുൻപും വാർത്തകൾ വന്നിരുന്നു. നിരവധി ലോക രാജ്യങ്ങൾ വിഷയത്തിൽ അഭിപ്രായം രേഖപ്പെടുത്തിയെങ്കിലും ചൈനീസ് സർക്കാർ അത് കൂട്ടാക്കാൻ തയ്യാറായില്ല. കൂടാതെ തായ്‌വാന് മേൽ കടുത്ത സാമ്പത്തിക സമ്മർദ്ദം ചെലുത്തുകയും വാണിജ്യ വ്യാപാര ബന്ധങ്ങളിൽ നിയന്ത്രണം ഏർപ്പെടുത്തുകയും ചൈന ചെയ്തിരുന്നു.
