സ്ത്രീകൾ അഭിമുഖീകരിക്കുന്ന സൗന്ദര്യപ്രശ്നങ്ങളിൽ ഒന്നാണ് മുഖത്തെ അനാവശ്യ രേമങ്ങൾ.പുരുഷ ഹോർമോണായ ടെസ്റ്റോസ്റ്റിറോണിന്റെ അളവ് വർദ്ധിക്കുമ്പോഴാണ് സ്ത്രീകളിൽ അമിത രോമവളർച്ചയുണ്ടാവാറ്.
പലരും ഇതിനെ അഭംഗിയായി കണക്കാക്കുന്നു. രോമം നീക്കം ചെയ്യാനായി വൻ തുക ചെലവാക്കി ലേസർ ചികിത്സയും വാക്സും ത്രെഡിംഗും ചെയ്ത് സമാധാനപ്പെടുന്നു. എന്നാൽ ഇവയെല്ലാം വേദനയുളവാക്കുന്ന മാർഗങ്ങളാണ്. വേദനയില്ലാതെ മുഖത്തെ രോമങ്ങൾ കളയാൻ സാധിക്കുന്ന മാർഗങ്ങൾ എന്തൊക്കെയെന്ന് നോക്കാം.
മുട്ടയുടെ വെള്ള
മുഖത്തെ രോമങ്ങൾ നീക്കം ചെയ്യാൻ മുട്ട ഉപയോഗിക്കാം. ഒരു പാത്രത്തിൽ മുട്ടയുടെ വെള്ള എടുത്ത് അതിലേക്ക് ഒരു ടീസ്പൂൺ കോൺ സ്റ്റാർച്ചും പഞ്ചസാരയും ചേർക്കുക. ഇത് നിങ്ങളുടെ മുഖത്ത് പുരട്ടി 30 മിനിറ്റ് ഉണങ്ങാൻ അനുവദിക്കുക. 30 മിനിറ്റിനു ശേഷം പതിയെ മുഖത്ത് നിന്നും മാസ്ക് നീക്കം ചെയ്യുക. മുഖം തണുത്ത വെള്ളത്തിൽ കഴുകുക. ആഴ്ചയിൽ രണ്ടു തവണ ഈ മിശ്രിതം മുഖത്ത് ഉപയോഗിച്ചാൽ മികച്ച ഫലം ലഭിക്കുന്നതായിരിക്കും.
മഞ്ഞൾ
ഒരു ടേബിൾ സ്പൂൺ മഞ്ഞളും അൽപം പാലും മിക്സ് ചെയ്ത് മുഖത്ത് നല്ലതു പോലെ തേച്ച് പിടിപ്പിക്കുക. 25 മിനിട്ടിനു ശേഷം കഴുകിക്കളയാം. ഇത് മുഖത്തെ രോമം പൂർണമായും ഇല്ലാതാക്കാൻ സഹായിക്കുന്നു.
തേൻ
ഒരു ടേബിൾ സ്പൂൺ തേൻ അൽപം നാരങ്ങ നീര്, ഒരു ടേബിൾ സ്പൂൺ പഞ്ചസാര എന്നിവയെല്ലാം കൂടി നല്ലതു പോലെ മിക്സ് ചെയ്ത് ഈ മിശ്രിതം എല്ലാം കൂടി 3 മിനിട്ടോളം ചൂടാക്കുക. തണുത്തതിനു ശേഷം മുഖത്ത് തേച്ച് പിടിപ്പിക്കാം
പപ്പായ
ഒരു കഷ്ണം പഴുത്ത പപ്പായ ഉടച്ച് അതിലേക്ക് ഒരു ടീസ്പൂൺ മഞ്ഞൾ ചേർക്കുക. ഇത് മുഖത്ത് വൃത്താകൃതിയിൽ മസ്സാജ് ചെയ്യുക. ശേഷം 10 മിനിറ്റ് നേരം ഉണങ്ങാൻ അനുവദിക്കുക. തുടർന്ന് തണുത്ത വെള്ളത്തിൽ കഴുകുക. മറ്റൊരു രീതിയിലും പപ്പായ മുഖത്തെ രോമങ്ങൾ കളയാൻ ഉപയോഗിക്കാം. ചെറിയ കഷണം പപ്പായയും വെള്ളരിക്കയുടെ പകുതിയും പഴം ചെറുതായി അരിഞ്ഞത് നാല് കഷണവും കൂടി ചേർത്ത് മിശ്രിതമാക്കുക. ഈ മിശ്രിതം മുഖത്തും കഴുത്തിലും പുരട്ടാം. പതിനഞ്ച് മിനിറ്റിന് ശേഷം കഴുകി കളയാം.
ജെലാറ്റിൻ
1 ടേബിൾസ്പൂൺ ഫ്ലേവർ ഇല്ലാത്ത ജെലാറ്റിൻ, ഒന്നര ടേബിൾസ്പൂൺ പാൽ എന്നിവ ഒരു പാത്രത്തിലെടുത്ത് 10-12 സെക്കൻഡ് നേരം മൈക്രോവേവ് ചെയ്യുക. ചുണ്ടിന്റെ മുകളിലായി ചൂടോടെ തന്നെ ഈ പേസ്റ്റ് പുരട്ടുക. ഇത് മുഖത്തിരുന്ന് ഉണങ്ങിയ ശേഷം, മിതമായ രീതിയിൽ ഇത് നീക്കം ചെയ്യുക. രണ്ടാഴ്ചയിലൊരിക്കൽ ഇത് ചെയ്യുന്നത് ശീലമാക്കുക.
Comments