ശ്രീനഗർ: പിഡിപി നേതാവ് മെഹബൂബ മുഫ്തിയ്ക്കെതിരെ ആഞ്ഞടിച്ച് ബിജെപി. ജമ്മു കശ് മീരിലെ യുവ തലമുറയുടെ മനസ്സിൽ മുഫ്തി വിഷം കുത്തി നിറയ്ക്കുകയാണെന്ന് ജമ്മു കശ്മീർ ബിജെപി അദ്ധ്യക്ഷൻ രവീന്ദർ റെയ്ന പറഞ്ഞു. കുൽഗാമിൽ സ്കൂൾ വിദ്യാർത്ഥികൾ രഘുപതി രാഘവ് രാജാറാം ഭജൻ ആലപിച്ചതിനെ മെഹബൂബ വിമർശിച്ചിരുന്നു. ഇതിനോട് ആയിരുന്നു ബിജെപി നേതാവിന്റെ പ്രതികരണം.
സ്വാതന്ത്ര്യ സമര കാലത്ത് ഭജനയിലൂടെയാണ് രാജ്യത്തെ മഹാത്മാ ഗാന്ധി ഒന്നിച്ച് നിർത്തിയിരുന്നത്. അതുകൊണ്ടുതന്നെ വിദ്യാർത്ഥികൾ രഘുപതി രാഘവ രാജാറാം പാടിയതിൽ തെറ്റില്ല. എന്നാൽ ചില ആളുകൾ മനപ്പൂർവ്വം വിവാദങ്ങൾ സൃഷ്ടിക്കാൻ ശ്രമിക്കുകയാണ്. രാഷ്ട്രീയ അജണ്ടകളാണ് ഇതിന് പിന്നിലെന്നും റെയ്ന പ്രതികരിച്ചു.
ജമ്മു കശ്മീരിലെ യുവ തലമുറയുടെ മനസ്സിൽ മെഹബൂബ മുഫ്തി വിഷം കുത്തി നിറയ്ക്കുകയാണ്. രാഷ്ട്രീയ താത്പര്യം മാത്രമാണ് ഇതിന് പിന്നിൽ. ഇത്തരം നികൃഷ്ട രാഷ്ട്രീയം കളിക്കുന്നതിൽ നിന്നും മെഹബൂബ പിന്മാറണം. എല്ലാ മതസ്ഥർക്കും വേണ്ടിയുള്ളതാണ് നമ്മുടെ രാജ്യം. മതം ഒരിക്കലും നമ്മെ യുദ്ധത്തിന് പ്രേരിപ്പിക്കുന്നില്ലെന്നും അദ്ദേഹം കൂട്ടിച്ചേർത്തു.
Comments