ആലപ്പുഴ: ഉപേക്ഷിക്കപ്പെട്ട നിലയിൽ കണ്ടെത്തിയ 12 ദിവസം പ്രായമുള്ള നവജാത ശിശുവിനെ ശിശുക്ഷേമ സമിതിക്ക് കൈമാറി. തുമ്പോളിയിലാണ് കുഞ്ഞിനെ കുറ്റിക്കാട്ടിൽ ഉപേക്ഷിക്കപ്പെട്ട നിലയിൽ കണ്ടെത്തിയത്. കുഞ്ഞിനെ ബീച്ചിലെ ശിശു പരിചരണ കേന്ദ്രത്തിലാകും പരിപാലിക്കുക. കുഞ്ഞിന് ആരോഗ്യ പ്രശ്നങ്ങൾ ഇല്ലെന്ന് ഡോക്ടർ വ്യക്തമാക്കിയിരുന്നു. തുടർന്നാണ് ശിശുക്ഷേമ സമിതി ഏറ്റെടുത്തത്.
കുഞ്ഞ് തന്റെതാണെന്ന് തുമ്പോളി സ്വദേശിയായ യുവതി സമ്മതിച്ചു. എന്നാൽ ഇവർ കുഞ്ഞിനെ വേണമെന്ന് ആവശ്യപ്പെട്ടിട്ടില്ല. സംഭവത്തിൽ പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്.അന്വേഷണം ഊർജിതമാക്കാൻ് ജില്ലാ കലക്ടർ കൃഷ്ണതേജ പോലീസിന് നിർദേശം നൽകിയിട്ടുണ്ട്.
വീട്ടിലെ കുളിമുറിയിലാണ് താൻ പ്രസവിച്ചതെന്ന് യുവതി പോലീസിനോട് സമ്മതിച്ചു. ക്രമം തെറ്റിയ ആർത്തവം മൂലം ഏഴാം മാസത്തിലാണ് ഗർഭിണിയാണെന്ന് അറിഞ്ഞതെന്നും യുവതി പറഞ്ഞിരുന്നു. ഭർത്താവും വീട്ടുകാരും അംഗീകരിക്കുമോയെന്ന ഭയത്തിലാണ് പറയാതിരുന്നതെന്നും യുവതി വ്യക്തമാക്കി. കുട്ടിയെ ഉപേക്ഷിച്ചതിന് യുവതിയുടെ പേരിൽ പോലീസ് കേസെടുത്തിരുന്നു.
