ഭൂമിയിലുള്ള എല്ലാ മനുഷ്യരുടേയും ഭാരത്തേക്കാൾ അധികമാണ് ഭൂമിയിലൂടെ നടക്കുന്ന ഉറുമ്പുകളുടെ ഭാരം എന്നൊരു പറച്ചിൽ കാലങ്ങളായി ഉണ്ടായിരുന്നു. കാരണം എവിടെ നോക്കിയാലും നമുക്ക് ഉറുമ്പുകളെ കാണാനാകും. അതുകൊണ്ട് തന്നെയാണ് ഇങ്ങനെ ഒരു ഉപമ പറയാറുള്ളത്. എന്നാൽ ലോകത്താകെയുള്ള ഉറുമ്പുകളുടെ എണ്ണം എത്രയെന്നത് ആരും കണ്ടുപിടിച്ചിട്ടില്ല. ഇപ്പോഴിതാ ഭൂമിയിലെ ഉറുമ്പുകളുടെ ഏകദേശം എണ്ണം ആദ്യമായി കണ്ടെത്തിയിരിക്കുകയാണ് ശാസ്ത്രജ്ഞർ. 20,000,000,000,000,000 അതായത് 20 ക്വാഡ്രില്യൻ ഉറുമ്പുകൾ ഭൂമിയിൽ എല്ലായിടത്തുമായി ഉണ്ടെന്നാണ് കണ്ടെത്തൽ. ഹോങ്കോംഗിലെ ഗവേഷകരാണ് ഇതുസംബന്ധിച്ചുള്ള പഠനം നടത്തിയത്.
ലോകത്തിന്റെ വിവിധ ഭാഗങ്ങളിൽ നിന്നുള്ള 489ഓളം ഡാറ്റകൾ ശേഖരിച്ചാണ് കണക്കുകൾ തയ്യാറാക്കിയത്. നാഷണൽ അക്കാദമി ഓഫ് സയൻസസിന്റെ പ്രൊസീഡിംഗ്സ് ജേണലിലാണ് ഉറുമ്പുകളുടെ എണ്ണം കണ്ടെത്തിയിരിക്കുന്ന പഠനം പ്രസിദ്ധീകരിച്ചിരിക്കുന്നത്. ഉറുമ്പുകളുടെ എണ്ണം ഓരോ മേഖലകളും അനുസരിച്ച് വ്യത്യാസപ്പെട്ടിരിക്കും. ഉഷ്ണമേഖലാ പ്രദേശങ്ങളിൽ ഉറുമ്പുകളുടെ എണ്ണം വളരെ അധികം കൂടുതലായിരിക്കും.
ലോകത്തിലെ എല്ലാ ഉറുമ്പുകളുടേയും ഭാരം കണക്കാക്കിയാൽ അത് ഏകദേശം 12 ദശലക്ഷം ടൺ വരുമെന്നാണ് പറയപ്പെടുന്നത്. ലോകത്തിലെ ആകെ പക്ഷികളുടേയും സസ്തനികളുടേയും ഭാരം 2 ദശലക്ഷം ടൺ ആണെന്ന് പറയുമ്പോഴാണ് അതിലെ ഭീമമായ വ്യത്യാസം നമുക്ക് മനസിലാകുന്നത്. ഹോങ്കോംഗ് യൂണിവേഴ്സിറ്റിയിലെ സ്കൂൾ ഓഫ് ബയോളജിക്കൽ സയൻസസിൽ നിന്നുള്ള സംഘമാണ് ഈ പഠനത്തിന് പിന്നിൽ. ഏകദേശം 100 ദശലക്ഷം വർഷത്തിലധികമായി ഉറുമ്പുകൾ ഭൂമിയിൽ ഉണ്ടെന്നാണ് പറയപ്പെടുന്നത്. ഇതുവരെ 12,000ത്തിലധികം ഉറുമ്പുകളെ ഭൂമിയിൽ കണ്ടെത്തിയിട്ടുണ്ട്.
Comments