അമരാവതി: തിരുപ്പതി ക്ഷേത്രത്തിൽ കാണിക്കയർപ്പിച്ച് മുസ്ലീം ദമ്പതികൾ. ചെന്നൈ സ്വദേശികളായ സൂബീന ബാനു, അബ്ദുൾ ഗാനി എന്നിവരാണ് ക്ഷേത്രത്തിൽ നേരിട്ടെത്തി കാണിക്ക നൽകിയത്. ക്ഷേത്രത്തിനോട് ചേർന്നുള്ള വിശ്രമ കേന്ദ്രത്തിന്റെ നവീകരണമുൾപ്പെടെ നടത്തുന്നതിനായി ഒരു കോടി രൂപയാണ് ദമ്പതികൾ കാണിക്കയായി നൽകിയത്.
ചെക്കും, ഡിഡിയുമായാണ് ദമ്പതികൾ കാണിക്ക നൽകിയത്.
തിരുമല തിരുപ്പതി ദേവസ്ഥാനം എക്സിക്യൂട്ടീവ് എ.വി ധർമ്മ റെഡ്ഡി ഇവരിൽ നിന്നും ചെക്കും, ഡിഡിയും ഏറ്റുവാങ്ങി. വിശ്രമ കേന്ദ്രത്തിന്റെ നവീകരണത്തിന് വേണ്ടി ഇതിൽ നിന്നുള്ള 87 ലക്ഷം രൂപ ചിലവഴിക്കും. അന്നദാനത്തിന് വേണ്ടിയാകും ബാക്കിയുള്ള തുക വിനിയോഗിക്കുക.
ഇന്നലെ വൈകീട്ടോടെയാണ് ദമ്പതികൾ ക്ഷേത്രത്തിൽ എത്തിയത്. വിവിധ പൂജകളിൽ പങ്കെടുത്ത ശേഷം രാത്രിയോടെ ഇവർ ചെന്നൈയിലേക്ക് മടങ്ങി. നേരത്തെയും അബ്ദുൾ ഗാനി തിരുപ്പതി ക്ഷേത്രത്തിന് കാണിക്ക നൽകിയിട്ടുണ്ട്. ഹിന്ദു ആചാരങ്ങൾ മുറുകെ പിടിക്കുന്ന ഗാനി മറ്റ് ക്ഷേത്രങ്ങളിൽ ദർശനം നടത്താറുണ്ട്.
