ഹൈദരാബാദ്: ഓസ്ട്രേലിയക്കെതിരെ തകർപ്പൻ ജയത്തോടെ ട്വന്റി 20 പരമ്പര സ്വന്തമാക്കി ഇന്ത്യ. രാജകീയമായ മടങ്ങി വരവിൽ അത്യുജ്ജ്വല അർദ്ധ സെഞ്ച്വറി നേടിയ വിരാട് കോഹ്ലിയും, തകർപ്പൻ അർദ്ധ സെഞ്ച്വറി നേടി ഇന്നിംഗ്സിന് അടിത്തറ പാകിയ സൂര്യകുമാർ യാദവും കളം നിറഞ്ഞാടിയപ്പോൾ, 6 വിക്കറ്റിനാണ് ഇന്ത്യയുടെ ജയം.
സൂര്യകുമാർ യാദവ് 36 പന്തിൽ 5 ഫോറുകളും 5 സിക്സുകളും ഉൾപ്പെടെ 69 റൺസുമായി മടങ്ങി. 48 പന്തിൽ 3 ഫോറുകളുടെയും 4 സിക്സറുകളുടെയും അകമ്പടിയോടെ 63 റൺസാണ് കോഹ്ലി നേടിയത്. 16 പന്തിൽ 25 റൺസുമായി ഹർദ്ദിക് പാണ്ഡ്യ ഇന്ത്യയുടെ വിജയം പൂർത്തിയാക്കി.
1 റണ്ണുമായി രാഹുലും 17 റൺസുമായി രോഹിത് ശർമ്മയും മടങ്ങിയ ശേഷം ക്രീസിൽ ഒരുമിച്ച സൂര്യകുമാർ യാദവും വിരാട് കോഹ്ലിയും ചേർന്ന് ഓസീസ് ബൗളർമാരെ തലങ്ങും വിലങ്ങും പ്രഹരിച്ചു. പതിവ് ആക്രമണോത്സുക ശൈലിയിൽ ബാറ്റ് വീശിയാണ് സൂര്യകുമാർ യാദവ് അർദ്ധ സെഞ്ച്വറി പൂർത്തിയാക്കിയത്. പ്രതാപ കാലത്തിലേക്ക് മടങ്ങിയെത്തിയ വിരാട് കോഹ്ലിയുടെ ഇന്നിംഗ്സ് മാസ്റ്റർ ക്ലാസ് സ്ട്രോക്കുകൾ കൊണ്ട് സമ്പന്നമാണ്. ട്വന്റി 20 ലോകകപ്പിനൊരുങ്ങുന്ന ഇന്ത്യക്ക് മികച്ച ആത്മവിശ്വാസം നൽകുന്നതാണ് കിംഗ് കോഹ്ലിയുടെ രാജകീയ മടങ്ങി വരവ്.
നേരത്തേ ഓപ്പണർ കാമറൂൺ ഗ്രീനിന്റെയും ടിം ഡേവിഡിന്റെയും അർദ്ധ സെഞ്ച്വറികളുടെ മികവിലാണ് ഓസ്ട്രേലിയ 186 റൺസ് നേടിയത്. 21 പന്തിൽ ഗ്രീൻ 52 റൺസ് നേടി. 27 പന്തിൽ 4 സിക്സറുകളുടെ അകമ്പടിയോടെ ഡേവിഡ് 54 റൺസും നേടി.
ടോസ് നഷ്ടമായി ബാറ്റിംഗിനിറങ്ങിയ ഓസീസ് 20 ഓവറിൽ 7 വിക്കറ്റ് നഷ്ടത്തിലാണ് 186 റൺസ് നേടിയത്. 19.5 ഓവറിൽ 4 വിക്കറ്റ് നഷ്ടത്തിലാണ് ഇന്ത്യ ലക്ഷ്യം മറികടന്നത്. ആദ്യ മത്സരത്തിൽ ഓസ്ട്രേലിയയും മഴ മൂലം 8 ഓവറായി ചുരുക്കിയ രണ്ടാം മത്സരത്തിൽ ഇന്ത്യയും വിജയിച്ചിരുന്നു. ഇന്നത്തെ ജയത്തോടെ 2-1ന് ഇന്ത്യ പരമ്പര സ്വന്തമാക്കി.
Comments