എറണാകുളം: പുതിയ ആഡംബര കാരവൻ സ്വന്തമാക്കി മോഹൻലാൽ. സമൂഹമാദ്ധ്യമങ്ങളിലാണ് അദ്ദേഹത്തിന്റെ പുതിയ വാഹനങ്ങളുടെ ചിത്രങ്ങൾ വ്യാപകമായി പ്രചരിക്കുന്നത്. അദ്ദേഹത്തിന്റെ ഇഷ്ട നമ്പറായ 2255 ആണ് പുതിയ കാരവന്റെയും നമ്പർ.
കഴിഞ്ഞ ദിവസമാണ് അദ്ദേഹം തന്റെ ആഡംബര വാഹനങ്ങളുടെ കൂട്ടത്തിലേക്ക് പുതിയ കാരവനും എത്തിച്ചത് എന്നാണ് വിവരം. എറണാകുളം ആർടിഒയ്ക്ക് കീഴിൽ സ്വകാര്യവാഹനമായാണ് പുതിയ കാരവൻ രജിസ്റ്റർ ചെയ്തിരിക്കുന്നത്. കിടപ്പുമുറിയുൾപ്പെടെയുള്ള അത്യാധുനിക സൗകര്യങ്ങൾ കാരവനിലുണ്ട്.
പ്രമുഖ വാഹന നിർമ്മാതാക്കളായ ഭാരത് ബെൻസാണ് കാരവന്റെ നിർമ്മാതാക്കൾ. ബൗൺ നിറത്തിലുള്ള വാഹനത്തിന്റെ വശങ്ങളിലായി വലിയ ഗ്രാഫിക്സ് സ്റ്റിക്കറുകളും പതിച്ചിട്ടുണ്ട്.
ജൂലൈയിൽ മോഹൻലാൽ കൊച്ചിയിൽ പുതിയ ആഡംബര ഫ്ളാറ്റ് സ്വന്തമാക്കിയത് വലിയ വാർത്തയായിരുന്നു. ഇതിന് പിന്നാലെയാണ് അദ്ദേഹം കാരവൻ വാങ്ങിയിരിക്കുന്നത്.
Comments