കോഴിക്കോട്: സിനിമയുടെ പ്രമോഷൻ പരിപാടിയ്ക്കിടെ ലൈംഗികാതിക്രമം ഉണ്ടായെന്ന പരാതിയുമായി പ്രശസ്ത യുവനടി ഗ്രേസ് ആന്റണി. ഫേസ്ബുക്ക് പോസ്റ്റിലൂടെയായിരുന്നു നടി പരാതി ഉന്നയിച്ച് രംഗത്ത് വന്നത്. തന്റെ സഹപ്രവർത്തകയ്‌ക്കും സമാനമായ അനുഭവം ഉണ്ടായതായി ഗ്രേസ് ആന്റണി ഫേസ്ബുക്ക് കുറിപ്പിൽ വ്യക്തമാക്കി.
കോഴിക്കോട് ഹൈലൈറ്റ് മാളിൽ നടന്ന പ്രമോഷൻ പരിപാടിയ്‌ക്കിടെയായിരുന്നു നടിയ്‌ക്ക് മോശം അനുഭവം ഉണ്ടായത്. പ്രമോഷൻ പരിപാടി കഴിഞ്ഞ് തിരികെ പോകുന്നതിനിടെ ആൾക്കൂട്ടത്തിൽ നിന്നൊരാൾ ശരീരത്തിൽ കടന്നു പിടിക്കുകയായിരുന്നു. ഗ്രേസ് ആന്റണിയ്‌ക്കൊപ്പം ഉണ്ടായിരുന്ന സഹപ്രവർത്തകയ്‌ക്കും സമാന അനുഭവം ഉണ്ടായി.
തനിക്ക് ഏറ്റവും ഇഷ്ടമുള്ള സ്ഥലമാണ് കോഴിക്കോട് എന്നും, അവിടെ വെച്ച് തനിക്ക് മോശം അനുഭവം ഉണ്ടായത് തന്റെ മനസ്സ് മരവിപ്പിച്ചെന്ന് നടി ഫേസ്ബുക്കിൽ കുറിച്ചു. എവിടെയാണ് കയറിപ്പിടിച്ചത് എന്നു പറയാൻ അറപ്പു തോന്നുന്നു.
പ്രമോഷന്റെ ഭാഗമായി പല സ്ഥലങ്ങളിലേക്കും പോയിട്ടുണ്ട്. എന്നാൽ അവിടെയൊന്നും ഇത്തരത്തിൽ ഒരു അനുഭവം നേരിടേണ്ടിവന്നിട്ടില്ല. മോശം അനുഭവം ഉണ്ടായപ്പോൾ സഹപ്രവർത്തക പ്രതികരിച്ചു. എന്നാൽ തനിക്ക് അതിന് കഴിഞ്ഞില്ല. ഒരു നിമിഷം ഞാൻ മരവിച്ചു പോയി. ആ മരവിപ്പിൽ തന്നെ നിന്നു കൊണ്ട് ചോദിക്കുവാണ്…. തീർന്നോ നിന്റെയൊക്കെ അസുഖമെന്നും ഗ്രേസ് ആന്റണി ചോദിച്ചു.
