ഭക്ഷണവും വെള്ളവും പോലെ തന്നെ ശരീരത്തിന് അത്യന്താപേക്ഷിതമാണ് ശരിയായ ഉറക്കവും. ക്ഷീണം അകറ്റി ദിനം മുഴുവൻ നമ്മെ ഊർജ്ജസ്വലരായി മാറ്റാൻ ഉറക്കത്തിന് കഴിയും. ദിവസേന ഒരാൾ ആറ് മണിക്കൂർ മുതൽ എട്ട് മണിക്കൂർവരെ ഉറങ്ങണം എന്നാണ് പഠനങ്ങൾ പറയുന്നത്. ഉറക്കമില്ലായ്മ നമ്മളിൽ പലതരം ആരോഗ്യപ്രശ്നങ്ങൾക്കും കാരണമായേക്കാം.
നമ്മുടെ പേശികൾക്കും ആന്തരികാവയവങ്ങൾക്കും വിശ്രമം ലഭിക്കുന്നത് നാം ഉറങ്ങുമ്പോഴാണ്. അതുകൊണ്ടുതന്നെ ഉറക്കമില്ലായ്മയെന്ന പ്രശ്നം നേരിടുന്നവർ അത് ഗൗരവത്തോടെ കാണണം. ചില ഭക്ഷണങ്ങൾ കഴിക്കുന്നത് നമുക്ക് ശരിയായ ഉറക്കം നൽകും. അവ ഏതെല്ലാമെന്ന് നോക്കാം.
സുഖമായ ഉറക്കം ആഗ്രഹിക്കുന്നവർ കഴിച്ചിരിക്കേണ്ട ഒന്നാണ് പഴം. പഴം മഗ്നീഷ്യത്തിന്റെ കലവറയാണ്. ഉറക്കത്തിന് ആവശ്യമായ ഹോർമോണുകൾ ഉണ്ടാക്കാൻ മഗ്നീഷ്യത്തിന് സാധിക്കും. അതിനാൽ രാത്രി പഴം കഴിച്ച ശേഷം കിടന്നുറങ്ങുന്നത് നന്നായിരിക്കും.
നേരത്തെ കിടന്നാലും വൈകി ഉറങ്ങുന്നവർ നമുക്കിടയിൽ ധാരാളം ഉണ്ട്. ഇത് മൂലം പല ശാരീരിക വിഷമതകളും ഇവർ അനുഭവിക്കാറുമുണ്ട്. വൈകി ഉറക്കം വരുന്നതാണ് ഇതിന് കാരണം. ഇക്കൂട്ടർ രാത്രി ചെറിപ്പഴം കഴിക്കുന്നത് ശീലമാക്കിയാൽ നന്നായിരിക്കും. ചെറിപ്പഴം നേരത്തെ ഉറങ്ങുന്നതിന് സഹായിക്കും. മാത്രമല്ല സുഖമായി ഉറങ്ങാനും ചെറിപ്പഴം കഴിക്കുന്നത് നല്ലതാണ്.
പല ആരോഗ്യപ്രശ്നങ്ങൾക്കുമുള്ള ഒറ്റമൂലിയാണ് തേൻ. ഉറക്കമില്ലായ്മയും പരിഹരിക്കാൻ തേൻ ഉപയോഗിക്കാം. അമിനോ ആസിഡ് ട്രൈംപ്റ്റോഫാനിനാൽ സമ്പുഷ്ടമാണ് തേൻ. ഇത് ഉറക്കത്തിന് വളരെ നല്ലതാണ്. അതിനാൽ കിടക്കുന്നതിന് മുൻപ് തേൻ കഴിക്കുന്നത് സുഖമായ ഉറക്കം ലഭിക്കാൻ ഉപകരിക്കും.
ബദാം ഇഷ്ടമല്ലാത്തവരായി ആരും ഉണ്ടാകില്ല. ശരീരത്തിന്റെ ആരോഗ്യത്തിന് ഏറ്റവും മികച്ച ഡ്രൈഫ്രൂട്ട് ആണ് ബദാം. കിടക്കുന്നതിന് മുൻപ് ബദാം കഴിക്കുന്നത് നന്നായി ഉറങ്ങാൻ നമ്മെ സഹായിക്കും. ഉറക്കത്തിന് ആവശ്യമായ ഹോർമോൺ ഉത്പാദിപ്പിക്കാൻ ബദാമിന് കഴിയും.
