ന്യൂഡൽഹി: തിരുവനന്തപുരം എം പി ശശി തരൂർ പ്രമാണി വർഗത്തിൽ നിന്നുള്ള നേതാവാണെന്ന് രാജസ്ഥാൻ മുഖ്യമന്ത്രിയും മുതിർന്ന കോൺഗ്രസ് നേതാവുമായ അശോക് ഗെഹ്ലോട്ട്. ശശി തരൂർ പ്രമാണി വർഗത്തിൽ നിന്നുള്ള നേതാവാണ്. കോൺഗ്രസിനെ ശക്തിപ്പെടുത്താനുള്ള കരുത്ത് മല്ലികാർജ്ജുൻ ഖാർഗെക്കാണ് ഉള്ളത്. കോൺഗ്രസ് തിരഞ്ഞെടുപ്പിൽ ഖാർഗെ തന്നെ വിജയിക്കും. ഇതായിരുന്നു അശോക് ഗെഹ്ലോട്ടിന്റെ വാക്കുകൾ.
കോൺഗ്രസ് അദ്ധ്യക്ഷ സ്ഥാനത്തേക്ക് മത്സരിക്കാൻ ആദ്യം പരിഗണിച്ചിരുന്ന നേതാവായിരുന്നു അശോക് ഗെഹ്ലോട്ട്. എന്നാൽ, രാജസ്ഥാനിൽ സച്ചിൻ പൈലറ്റിനെതിരെ ഗെഹ്ലോട്ട് പടയൊരുക്കം നടത്തിയതോടെ, പാർട്ടിയ്ക്കുള്ളിൽ പിന്തുണ നഷ്ടമായ ഗെഹ്ലോട്ട് മത്സര രംഗത്ത് നിന്നും പിന്മാറുകയായിരുന്നു.
ഗെഹ്ലോട്ടിന്റെ പിന്മാറ്റത്തിന് ശേഷം ദിഗ്വിജയ് സിംഗിന്റെ പേരും പരിഗണിച്ചിരുന്നു. ഇതോടെ ജി-23 നേതാക്കൾ കലാപക്കൊടി ഉയർത്തി. തുടർന്ന് നെഹ്രു- വാദ്ര കുടുംബത്തിന്റെ അനുനയ നീക്കം എന്ന നിലയ്ക്ക്, മല്ലികാർജ്ജുൻ ഖാർഗെയെ സ്ഥാനാർത്ഥിയാക്കി കോൺഗ്രസ് ഹൈക്കമാൻഡ് താത്കാലികമായി പ്രശ്നം പരിഹരിക്കുകയായിരുന്നു.
അതേസമയം, തന്നെ പിന്തുണയ്ക്കുന്ന നേതാക്കളുടെ പേരുകൾ ശശി തരൂർ പുറത്ത് വിട്ടിട്ടുണ്ട്. മുൻ കേന്ദ്ര മന്ത്രിമാരായ മൊഹ്സിന കിദ്വായ്, സൈഫുദ്ദീൻ സോസ്, പ്രമുഖ നേതാക്കളായ കാർത്തി ചിദംബരം, പ്രദ്യുത് ബർദളോയ്, എം കെ രാഘവൻ, മുഹമ്മദ് ജവായ്ദ്, ജി-23 നേതാവ് സന്ദീപ് ദീക്ഷിത് എന്നിവരുടെ പേരുകളാണ് പട്ടികയിലുള്ളത്.
