ഇനി എത്ര വിഭവങ്ങൾ മാറി മാറി വന്നാലും,മലയാളികളുടെ മനസിൽ ചോറിനും കറിയ്ക്കുമുള്ള സ്ഥാനം ഒന്ന് വേറെ തന്നെയാണ്. കുറച്ച് ചോറ് കഴിച്ചാലേ വിശപ്പ് ഇല്ലാതാകൂ, എന്നത് മലയാളികളുടെ ശീലമായി പോയി. പക്ഷേ ചോറിലെ കലോറിയുടെ കാര്യമാലോചിക്കുമ്പോൾ ചോറ് വേണ്ട ചപ്പാത്തി എന്നാവും. കാരണം ഒരു കപ്പ് ചോറിൽ ഏതാണ്ട് 200 കലോറിയാണ് ഉള്ളത്. ഇത്ര വലിയ അളവിലുള്ള കലോറി കാരണം ചോറ് ഇഷ്ടമുണ്ടായിട്ടും ഉപേക്ഷിക്കുന്നവരാണോ നിങ്ങൾ.എന്നാൽ ചില പൊടിക്കൈകൾ പ്രയോഗിച്ചാൽ ചോറിലെ കലോറി നമുക്ക് കുറയ്ക്കാം.
ചോറ് ഉണ്ടാക്കാനായി തിളച്ച വെള്ളത്തിലേക്ക് അരി കഴുകി ഇടുമ്പോൾ ഒരു സ്പൂൺ വെളിച്ചെണ്ണ കൂടി ചേർക്കുക. തുടർന്ന് 40 മിനിറ്റ് വേവിച്ച ശേഷം 10-12 വരെ മണിക്കൂർ ഫ്രിഡ്ജിൽ വെച്ച് കഴിക്കാം. ഇങ്ങനെ തയ്യാറാക്കുന്ന ചോറിൽ പത്ത് മുതൽ അൻപത് ശതമാനം വരെ കലോറി കുറവുണ്ടെന്നാണ് കണ്ടെത്തൽ. ചോറിലെ ഗ്ലൂക്കോസിന്റെ അളവ് കുറയ്ക്കാനും ഈ രീതി സഹായിക്കും. ഇങ്ങനെ വെളിച്ചെണ്ണ ചേർത്ത് ഫ്രിഡ്ജിൽ വെയ്ക്കുന്നതിലൂടെ ചോറിലെ കെമിക്കൽ കോമ്പോസിഷൻ ആരോഗ്യകരമായ രീതിയിൽ വ്യത്യാസപ്പെടും.ശ്രീലങ്കയിലെ കോളേജ് ഓഫ് കെമിക്കൽ സയൻസസിലെ ഗവേഷകരാണ് ഈ നിർണ്ണായക കണ്ടുപിടുത്തത്തിന് പിന്നിൽ.
അന്നജവും സ്റ്റാർച്ച് എന്നറിയപ്പെടുന്ന പ്രത്യേക തരം കാർബോഹൈഡ്രേറ്റും ചേർന്നതാണ് ചോറ്. ഇത് പെട്ടെന്ന് ഗ്ലൂക്കോസായി രൂപാന്തരം പ്രാപിച്ച് പെട്ടെന്ന് രക്തക്കുഴലുകളിലേക്ക് ആഗിരണം ചെയ്യപ്പെടും. എന്നാൽ വെളിച്ചെണ്ണയൊഴിച്ച് പാചകം ചെയ്ത ചോറ് ഫ്രീസറിൽ കൂടി വയ്ക്കുമ്പോൾ പെട്ടെന്നു ദഹിയ്ക്കുന്ന അന്നജം പ്രതിരോധക അന്നജമായി മാറും. അതായത്, കൊഴുപ്പ് ശരീരത്തിൽ പെട്ടെന്നലിഞ്ഞു ചേരില്ല. ഇത് തടി കുറയ്ക്കാൻ സഹായകമാകും.
Comments