ന്യൂഡൽഹി : രാജ്യത്തെ ഏറ്റവും വൃത്തിയുള്ള നഗരങ്ങളുടെ പട്ടികയിൽ കേരളത്തിലെ നഗരങ്ങൾ പിന്നിൽ. പട്ടികയിലെ ആദ്യ 100 എണ്ണത്തിൽ കേരളത്തിലെ ഒരു നഗരം പോലും ഇടം നേടിയില്ല. ആലപ്പുഴയ്ക്ക് 190-ാം സ്ഥാനം എന്നതാണ് കേരളത്തിന്റെ ആകെയുള്ള നേട്ടം. 10 ലക്ഷം വരെ ജനസംഖ്യയുള്ള നഗരങ്ങളുടെ പട്ടികയിലാണ് ആലപ്പുഴ ഇടം നേടിയത്.
തുടർച്ചയായി ആറാം തവണയും മദ്ധ്യപ്രദേശിലെ ഇൻഡോറാണ് ഒന്നാം സ്ഥാനം നേടിയത്. ഗുജറാത്തിലെ സൂറത്ത്, മഹാരാഷ്ട്രയിലെ നവി മുംബൈ, വിശാഖപട്ടണം, വിജയവാഡ എന്നീ നഗരങ്ങൾ പിന്നാലെയുണ്ട്. കേന്ദ്ര നഗരകാര്യ മന്ത്രാലയമാണ് ശുചിത്വ സർവ്വേ നടത്തിയത്.
പത്ത് ലക്ഷം വരെ ജനസംഖ്യുള്ള ഏറ്റവും ശുചിത്വമുള്ള നഗരങ്ങളുടെ പട്ടികയിൽ കൊച്ചി 298 -ാം സ്ഥാനത്താണ്. തിരുവനന്തപുരം 302-ാം സ്ഥാനത്തും, തൃശൂർ 313 – ാം സ്ഥാനത്തും, പാലക്കാട് 319-ാം സ്ഥാനത്തും, കോഴിക്കോട് 336- ാം സ്ഥാനത്തുമാണ്. ദക്ഷിണേന്ത്യയിലെ മികവ് പുലർത്തുന്ന നഗരങ്ങളുടെ പട്ടികയിലും കേരളത്തിലുള്ള ഒരു സ്ഥലം പോലുമില്ല.
രാജ്യത്തെ എല്ലാ നഗര തദ്ദേശ സ്ഥാപനങ്ങളെയും ഉൾപ്പെടുത്തിയുള്ള റാങ്കിംഗിലും സംസ്ഥാനത്തെ നഗരങ്ങൾ ഏറെ പിന്നിലാണ്. ആലപ്പുഴ (1347), കൊച്ചി (2593), തിരുവനന്തപുരം (2735), തൃശൂർ (2827), പാലക്കാട് (2901), കോഴിക്കോട് (3192), കൊല്ലം (3821) എന്നിങ്ങനെയാണ് ദേശീയ റാങ്കിംഗിൽ നമ്മുടെ നഗരങ്ങളുടെ അവസ്ഥ.
