തിരുവനന്തപുരം: നിയമലംഘകർക്ക് തടയിടാൻ പുതിയ സംവിധാനം അവതരിപ്പിച്ച് കേരള പോലീസ്. നിരത്തിൽ ട്രാഫിക് നിയമലംഘനങ്ങൾ ശ്രദ്ധയിൽപ്പെട്ടാൽ കേരള പോലീസിന്റെ ‘ശുഭയാത്ര’ വാട്സാപ്പ് നമ്പറിലേക്ക് സന്ദേശമയക്കാം. നിയമം ലംഘിക്കുന്നുവെന്ന് വ്യക്തമാകുന്ന ഫോട്ടോയും വീഡിയോയും സഹിതം മെസേജ് അയക്കാവുന്നതാണെന്ന് കേരളാ പോലീസ് അറിയിച്ചു. വിലപ്പെട്ട ഒരു മെസേജ് അപകടങ്ങൾ ഒഴിവാക്കിയേക്കാമെന്നും നിരവധി ജീവനുകൾ സംരക്ഷിക്കാൻ സഹായിച്ചേക്കാമെന്നും ഫേസ്ബുക്കിൽ പങ്കുവെച്ച കുറിപ്പിൽ പോലീസ് വ്യക്തമാക്കി.
9747001099 എന്ന വാട്സാപ്പ് നമ്പറിലേക്കാണ് മെസേജ് ചെയ്യേണ്ടത്. സന്ദേശത്തിന്മേൽ സ്വീകരിച്ച നടപടി ഏഴ് ദിവസത്തിനകം സന്ദേശമയച്ചയാളെ അറിയിക്കുന്നതാണെന്നും പോലീസ് പറയുന്നു. കേരളത്തിലെ ആകെ വാഹനങ്ങളുടെ അഞ്ചിലൊന്ന് വാഹനങ്ങളെയും നിയമലംഘനം നടത്തിയെന്ന് കണ്ടെത്തി പോലീസ് പിടികൂടിയിട്ടുണ്ട്. രേഖപ്പെടുത്താതെ പോകുന്ന നിയമലംഘനങ്ങളും നിരത്തുകളിൽ നടക്കുന്നു. അത്തരം അശ്രദ്ധരായ ഡ്രൈവർമാരെ കൂടി നിയമത്തിന് മുന്നിൽ കൊണ്ടുവരാൻ പൊതുജനങ്ങളുടെ സഹകരണം ആവശ്യമാണെന്നും കേരളാ പോലീസ് അറിയിച്ചു.
ഫേസ്ബുക്ക് കുറിപ്പിന്റെ പൂർണ്ണരൂപം:
ദയവായി ശ്രദ്ധിക്കൂ..
ഈ വർഷം ഓഗസ്റ്റ് മാസം വരെ 29369 റോഡപകടങ്ങളിൽ 2895 പേരുടെ ജീവനുകളാണ് നിരത്തുകളിൽ ഹോമിക്കപ്പെട്ടത്.
ഏറ്റവും ഒടുവിൽ വടക്കാഞ്ചേരിയിൽ വച്ചുണ്ടായ ദാരുണാപകടം നാമേവരെയും ദുഃഖത്തിലാഴ്ത്തി.
കേരളത്തിൽ ഏകദേശം ഒന്നരക്കോടിയോളം വാഹനങ്ങളുണ്ടെന്നാണ് കണക്ക്. പലവിധ ട്രാഫിക് നിയമങ്ങൾ ലംഘിച്ചതിന്
2022 ഓഗസ്റ്റ് വരെ മാത്രം മുപ്പതുലക്ഷത്തിലധികം ( 30 01588 ) പേർക്ക് പിഴ നൽകിയിട്ടുമുണ്ട്. ഇതിൽ
അലക്ഷ്യവും അശ്രദ്ധവുമായുമുള്ള ഡ്രൈവിംഗിന് 16,657 പേർക്കെതിരെയും മദ്യപിച്ച് വാഹനമോടിച്ചതിന് 32,810 പേർക്കെതിരെയും കേസെടുത്തിട്ടുണ്ട്.
അതായത് ആകെ വാഹനങ്ങളുടെ അഞ്ചിലൊന്ന് വാഹനങ്ങളെ നിയമലംഘനം നടത്തിയതിന് പോലീസ് പിടികൂടിയിട്ടുണ്ട്. അതിലും എത്രയോ ഇരട്ടി നിയമലംഘനങ്ങൾ നിരത്തുകളിൽ നടക്കുന്നു. അത്തരം നിയമലംഘകരെക്കൂടി നിയമത്തിനു മുന്നിൽ കൊണ്ടുവരാൻ പോലീസിന് പൊതുജനങ്ങളുടെ സഹകരണം കൂടിയേ തീരൂ.
നിരത്തിൽ ട്രാഫിക് നിയമലംഘനങ്ങൾ നിങ്ങളുടെ ശ്രദ്ധയിൽപ്പെട്ടാൽ കേരള പോലീസിന്റെ ‘ശുഭയാത്ര’ വാട്സാപ്പ് നമ്പറിലേക്ക് നിങ്ങൾക്ക് ഫോട്ടോയും വീഡിയോയും സഹിതം മെസ്സേജ് അയക്കാം. നിങ്ങളുടെ വിലപ്പെട്ട ഒരു മെസ്സേജ് അപകടങ്ങൾ ഒഴിവാക്കിയേക്കാം അതിലൂടെ നിരവധി ജീവനുകൾ സംരക്ഷിക്കപ്പെട്ടേയ്ക്കാം.
മെസ്സേജ് വാട്സാപ്പ് ചെയ്യേണ്ട നമ്പർ – 9747001099
നിങ്ങളുടെ സന്ദേശത്തിന്മേൽ സ്വീകരിച്ച നടപടി ഏഴു ദിവസത്തിനകം നിങ്ങളെ അറിയിക്കുന്നതാണ്.
Comments