ലക്നൗ: 14-കാരനെ ക്രൂരമായി ആക്രമിച്ച് അയൽവീട്ടിലെ വളർത്തുനായ. കാൺപൂരിലെ നാസിറാബാദ് പോലീസ് സ്റ്റേഷൻ പരിധിയിൽ വ്യാഴാഴ്ചയാണ് സംഭവമുണ്ടായത്. ലജ്പത് നഗർ സ്വദേശിയാണ് ആക്രമണത്തിന് ഇരയായത്. വീട്ടിൽ നിന്നും പുറത്തേക്കിറങ്ങിയ കുട്ടിയെ സമീപത്തെ വീട്ടിലെ റോട്ട് വീലർ നായയാണ് ക്രൂരമായി ആക്രമിച്ചത്. 14-കാരന്റെ കാലിൽ നിന്നും മാംസകഷ്ണം നായ കടിച്ചെടുത്തുവെന്നാണ് റിപ്പോർട്ട്.
കാലിൽ കൂടാതെ ശരീരത്തിന്റെ പല ഭാഗങ്ങളിലും നായയുടെ കടിയേറ്റിട്ടുണ്ട്. കുട്ടിയെ ആക്രമിക്കുന്നത് കണ്ട് ഓടിയെത്തിയ പ്രദേശവാസികളാണ് നായയിൽ നിന്നും രക്ഷപ്പെടുത്തിയത്. ഉടൻ തന്നെ 14-കാരനെ ആശുപത്രിയിൽ എത്തിച്ചു. തൊട്ടുപിന്നാലെ വളർത്തുനായയുടെ ഉടമ ദീപക് ടണ്ടന് നേരെ കുടുംബം നാസിറാബാദ് പോലീസിലും കാൺപൂർ മുനിസിപ്പൽ കോർപ്പറേഷനിലും പരാതി നൽകി.
വളർത്തുനായകളുടെ വിവരങ്ങൾ മുനിസിപ്പൽ കോർപ്പറേഷനിൽ രജിസ്റ്റർ ചെയ്യണമെന്ന നിയമം പാലിക്കാതെയാണ് റോട്ട് വീലറിനെ പരിപാലിച്ചിരുന്നതെന്ന് അധികൃതർ കണ്ടെത്തിയിട്ടുണ്ട്. നേരത്തെ മറ്റ് മൂന്ന് പേരെ ഇതേ നായ കടിച്ചിട്ടുണ്ടെന്നാണ് വിവരം. തുടർന്ന് ഉടമയുടെ വീട്ടിലെത്തി നായയെ അധികൃതർ കൊണ്ടുപോയി.
